سعودی ولی عہد نے نیا جدید شہر بسانے کا اعلان کردیا

سعودی ولی عہد شہزادہ محمد بن سلمان نے دارالحکومت کے عرقہ نامی محلے میں  نیا جدید شہر  بسانے کا اعلان کیا ہے۔  سعودی پریس ایجنسی کے مطابق یہ دنیا کا پہلا غیرمنافع بخش شہر ہوگا ۔ یہ  منصوبہ بند شہرعالمی سطح پرغیرمنافع بخش شعبے کی ترقی کانمونہ اور نوجوانوں اور رضاکار گروپوں کے ساتھ ساتھ مقامی اور بین الاقوامی غیرمنافع بخش اداروں کے لیے ترقی کے عمل کی ایک تجربہ گاہ ثابت ہوگا۔

سعودی ولی عہد شہزادہ محمد بن سلمان نے کہا ہے کہ یہ منصوبہ ایسی خدمات مہیاکرے گا جو شہر کی پیش کشوں سے فائدہ اٹھانے والے تمام افراد کے لیے پُرکشش ماحول پیدا کرنے میں معاون ثابت ہوں گی۔

 یہ  شہزادہ محمد بن سلمان نان پرافٹ سٹی ڈیجیٹل ٹوئن ماڈل پرعمل پیرا ہوگا۔اس میں اکیڈمیز، کالج، مِسک اسکول ،کانفرنس سنٹر،سائنس میوزیم اورتخلیقی مراکزقائم کیے جائیں گے، جہاں سائنسی علوم اورنئے دورکی ٹیکنالوجی جیسے مصنوعی ذہانت (اے آئی)، آئی او ٹی اورروبوٹکس میں جدت پسندوں کے عزائم کی تکمیل کے لیے جگہ  فراہم کی جائے گی ۔

اس میں آرٹس اکیڈمی اور آرٹس گیلری بھی تعمیرکی جائے گی جس میں آرٹ تھیٹر، پلے ایریا، کوکنگ اکیڈمی اور مربوط رہائشی کمپلیکس ہوں گے۔ اس کے علاوہ شہر دنیا بھر سے کمیونٹی کی شراکت کو آگے بڑھانے کے لیے اختراعی کاروباری اداروں کی معاونت کے لیے سرمایہ کارفرموں اورسرمایہ کاروں کی میزبانی کرے گا۔

یہ منصوبہ بند غیرمنافع بخش شہر وادی حنیفہ سے متصل ارقہ محلے میں ولی عہد کی طرف سے وقف اراضی پر تعمیر کیا جائے گا۔

ایس پی اے کے مطابق شہرکا ماسٹر پلان انسان مرتکز اورجدید ڈیجیٹل میٹروپولس کا حسین امتزاج ہے۔جو پائیدار، پیادہ دوست ہے یعنی پیدل چلنے والوں کی سہولت کے مطابق ڈیزائن کیا گیا ہے اور پائیدارترقی کو فروغ دینے کے لیے اس کے کل رقبے کا 44 فی صد سے زیادہ سبزکھلی جگہوں کے لیے مختص ہو گا۔

یاد  رہے کہ امیر محمد بن سلمان سٹی، وادی حنیفہ کے بالمقابل عرقہ محلے میں ولی عہد کے پلاٹ پر تعمیر ہوگا، اس کا رقبہ 3 سے 4 مربع کلو میٹر کے لگ بھگ ہے۔