عوام، ممبران پارلیمان حکومت کے ساتھ نہیں، پی ڈی ایم کے ساتھ ہے، بلاول بھٹو

بلاول بھٹو زرداری اور مولانا فضل الرحمان نے  میڈیا سے مشترکہ گفتگو کی،چیئرمین پیپلزپارٹی بلاول بھٹو نے کہا کہ   آج ہم صدر پاکستان ڈیموکریٹک موومنٹ مولانا فضل الرحمان کے پاس آئے ہیں،پی ڈی ایم کا مشترکہ امیدوار سید یوسف رضا گیلانی بھی موجود ہیں،پی ڈی ایم نے حکومت کو ہر میدان، ہر محاذ پر چیلنج کیا ہے۔

 بلاول بھٹو نے کہا کہ   پاکستان ڈیموکریٹک موومنٹ نے حکومت کو پورے پاکستان میں ہروایا ہے،حکومت نے کرم ایجنسی اور ڈسکہ میں دھاندلی کی، جو سب کے سامنے ہے،عوام، ممبران پارلیمان حکومت کے ساتھ نہیں، پی ڈی ایم کے ساتھ ہے،ہم اپنے مشن میں کامیاب ہوں گے، اس کٹھ پتلی حکومت، وزیر اعظم کو گھر بھیجیں گے۔

پیپلزپارٹی کے رہنما بلاول بھٹو کا کہنا تھا کہ   پختونخوا کی اپوزیشن کیساتھ مل کر الیکشن لڑ رہے ہیں، یہ ہماری کامیابی ہے، اب حکومت کو ان کے گھر میں جا کر چیلنج کر رہے ہیں، متحد ہو کر حکومت کو چیلنج کریں گے، ن لیگ کے پنجاب سے سینیٹ کے ووٹ ہمارے لیے چئیرمین سینیٹ کے لیے فائدہ من ہونگے۔

پی ڈی ایم کے سربراہ مولانا فضل الرحمان نے میڈیا سے گفتگو میں کہا کہ  بلاول بھٹو، یوسف رضا گیلانی کا شکرگزار ہوں کہ وہ تشریف لائے،  پوری قوم کے لیے خوش خبری ہے کہ پی ڈی ایم چاروں صوبوں اور مرکز میں سینیٹ انتخاب میں متحد ہے، مشترکہ حکمت عملی کے تحت سینیٹ الیکشن لڑ رہے ہیں، انشااللہ اچھے نتائج سامنے آئیں  گے۔

مولانا فضل الرحمان نے کہا کہ   یہ سمجھ رہے تھے یہ پی ڈی ایم کی جماعتیں ایک دوسرے کے ووٹ توڑیں گی، لیکن ہم سینیٹ الیکشن کے متحدہ طور پر کامیاب نتائج حاصل کریں گے، ملک بھر میں پی ڈی ایم عوام کی تنہا آواز ہے، کل اسلام آباد میں تین نوجوانوں کو شہید کیا گیا، جہاں امن نہیں ہو گا وہاں معیشت نہیں ہو گی۔پی ڈی ایم ایک تحریک کا نام ہے، اخلاقی طور پر کوشش کرتے ہیں کہ ایک دوسرے کو نہ کاٹیں۔