آرمینیا اور آذربائیجان کے درمیان سرحد پر ایک بارپھر صورتحال کشیدہ

غیر ملکی خبر رساں ادارے کے مطابق آرمینیا اور آذربائیجان کے درمیان سرحد پر ایک بارپھر صورتحال کشیدہ ہوگئی ہے، آرمینیا نے آذربائیجان پر حملے کا الزام  لگا دیا ہے۔

آرمینیائی وزارتِ دفاع کا کہنا ہے کہ آذربائیجان کی فورسز نے آرمینیائی پوزیشنز پر حملہ کیا،15اہلکارمارےگئے۔

دوسری جانب  آرمینیا نے روس سے کہا کہ وہ آذربائیجان کے خلاف اپنی علاقائی خودمختاری کے دفاع میں مدد کرے۔

آذری وزارت دفاع نے آرمینیا کے ساتھ سرحد پر کشیدہ صورتحال کے بارے میں بات کی، انہوں نے کہا کہ آرمینیائی افواج آذری فوج کے ٹھکانوں پر توپ خانے اور مارٹر فائر سے گولہ باری کر رہی ہیں۔ 

واضح رہے کہ روس کا آرمینیا میں ایک فوجی اڈہ ہے اور ساتھ ہی ناگورنو کاراباخ انکلیو میں امن فوج بھی ہے جہاں گزشتہ سال کی جنگ شروع ہوئی تھی۔آرمینیائی اپیل پر روس کی طرف سے فوری طور پر کوئی ردعمل سامنے نہیں آیا۔

خیال رہے کہ یریوان اور باکو کے درمیان گزشتہ سال  آرمینیائی افواج اور  آذری فوج کے درمیان 44 روزہ جنگ کے بعد کشیدگی برقرار ہے، جس میں کم از کم 6,500 افراد ہلاک ہوئے اور آذربائیجان کی فیصلہ کن فتح پر اختتام پذیر ہوا۔