بلوچستان عوامی پارٹی کا پارلیمنٹ کےمشترکہ اجلاس میں وفاقی حکومت کی حمایت کا اعلان

تفصیلات کے مطابق  بلوچستان عوامی پارٹی  نے مشترکہ اجلاس میں وفاقی حکومت کی حمایت کا اعلان کردیا ہے۔ بلوچستان عوامی پارٹی کے صدرظہور بلیدی کا کہنا ہے کہ  ہم بطور اتحادی وزیراعظم عمران خان کی غیر مشروط حمایت جاری رکھیں گے،  کل پارلیمان کے مشترکہ اجلاس میں بی اے پی کے تمام اراکین بھرپور شرکت کرینگے۔

صدر بلوچستان عوامی پارٹی  نے کہا کہ  بلاشبہ موجودہ وفاقی حکومت نے پہلی بار جنوبی بلوچستان جیسے پسماندہ علاقوں کو ترجیح دی، بلوچستان میں  سیاسی بحران کاخاتمے  وزیراعظم عمران خان کی مداخلت کے بغیر ناممکن تھا،  وزیراعظم عمران خان نے ہی اہم عہدوں پر بلوچوں کو نمائندگی دی،  وزیراعظم عمران خان ہی ناراض بلوچ کو قومی دھارے میں لانےکیلئے سنجیدہ ہیں۔

قبل ازیں صدرعارف علوی نے قومی اسمبلی اور سینیٹ کا مشترکہ اجلاس طلب کرلیا ہے، مشترکہ اجلاس 17 نومبر، بروز بدھ، دوپہر 12 بجے منعقد ہوگا۔اجلاس میں حکومت کی جانب الیکٹرانک مشین سمیت مختلف بلز پیش کیے جانے کا امکان ہے۔

اس سے قبل حکومت نے 11 نومبر کو پارلیمنٹ کا مشترکہ اجلاس طلب کیا تھا،جسے بعد میں موخر کردیا گیا تھا۔ فواد چوہدری  کا کہنا تھا کہ   انتخابی اصلاحات ملک کے مستقبل کا معاملہ ہے، ہم نیک نیتی سے کوشش کر رہے ہیں کہ ان معاملات پر اتفاق رائے پیدا ہو اس سلسلے میں اسپیکر اسد قیصر کو اپوزیشن سے ایک بار پھر رابطہ کرنے کا کہا گیا ہے،تا کہ ایک متفقہ انتخابی اصلاحات کا بل لایا جا سکے۔  پارلیمان کے مشترکہ اجلاس کو اس مقصد کیلئے مو خر کیا جا رہا ہے۔