یہ قانون سازی میری ذات کیلئے نہیں بلکہ جمہوریت کو مضبوط کرنے کیلئے ہے،وزیراعظم

تفصیلات کے مطابق پارلیمنٹ مشترکہ اجلاس میں شرکت کے بعد  وزیراعظم ایوان سے حکومتی اراکین کی لابی میں بھی گئے،جہاں  وزیراعظم عمران خان نے حکومتی ارکان سے گفتگو کی ، وزیراعظم نے اتحادی اور حکومتی خواتین ارکان سے بھی ملاقات کی، وزیراعظم نے انتخابی اصلاحات سمیت دیگر  بلوں کی منظوری پر مبارکباد دی۔وزیراعظم نے فنکشنل لیگ کی رہنما سائرہ بانو سے بھی ملاقات کی اور  فنکشنل لیگ کے ارکان اسمبلی اور قیادت کا شکریہ ادا کیا۔

وزیر اعظم عمران خان کا اس موقع پر کہنا تھا کہ  یہ قانون سازی میری ذات کے لیے نہیں بلکہ جمہوریت کو مضبوط کرنے کے لیے ہے،  اتحادی جماعتوں کا قانون سازی میں ساتھ دینے پر ان کاشکریہ ادا کرتا ہوں،  آج صاف و شفاف انتخابات کی بنیاد رکھنے میں آپ سب نے اہم کردار کیا،سمندر پار پاکستانی اس ملک کی معیشت میں ریڑھ کی ہڈی ہیں، اب سمندرپار پاکستانیوں بھی انتخابی عمل کا حصہ بن سکیں گے۔

فنکشنل لیگ کی رہنما رکن قومی اسمبلی سائرہ بانو نے بھی وزیراعظم کو مبارکباد دی، سائرہ بانو نے کہا کہ  عوام کے مفاد میں کی گئی قانون سازی میں پہلے بھی ساتھ تھے اور آئندہ بھی ساتھ دیں گے۔