قومیں غریب اس وقت ہوتی ہیں جب ان کے ملک کاسربراہ چوری کرے:وزیراعظم

تفصیلات کے مطابق اسلام آباد میں کامیاب جوان پروگرام کے تحت تقریب سے خطاب کرتے ہوئے وزیراعظم عمران خان کا کہنا تھا کہ آج کل آڈیو ٹیپس پر بات ہورہی ہے،ٹیپس میں ججزکے نام آرہے ہیں،لیکن شریف خاندان 4فلیٹس  کا جواب دینے کے بجائے سب کو برا بھلا کہہ رہےہیں،انہوں نےعدلیہ ، فوج کو برا بھلا کہا مجھے کہتے ہیں یہ توبہت ظالم ہے۔

ان کا کہنا تھا کہ لندن میں 4مہنگے فلیٹس مریم صفدر کی ملکیتی ہیں، 2016میں پاناما کیس آیا اس میں نوازشریف کانام بھی آیا، پوچھا لندن کے فلیٹس  کہاں سے آئے تو پہلے آیا  کیوں نکالا،دوبارہ پوچھا لندن فلیٹس کہاں سے آئے پھر عدلیہ کو نشانہ بنایا گیا،یہ مجھے بھی سپریم کورٹ لیکر گئے  میں  نے ایک ایک چیزدی۔ 

وزیراعظم عمران خان کا کہنا تھا کہ مدینہ کی ریاست کی بنیاد اخلاقیات پر رکھی گئی تھی،جس قوم میں اچھے برے کی تمیز ختم ہوجائے وہ قوم ختم ہوجاتی ہے،جس قوم کی اخلاقیات ختم ہوجائے وہ قوم ختم ہوجاتی ہے،قوم تب تباہ ہوتی ہے جب چوری کو برا نہ سمجھا جائے۔

ان کا مزید کہنا تھا کہ کوئی انسان شارٹ کٹ سے بڑا آدمی نہیں بن سکتا، اپنی غلطیوں سے سیکھ کر انسان اوپر چلا جاتا ہے،کامیاب وہ شخص ہوتا ہے جو بڑی سوچ اور بڑا خواب رکھتا ہے اور پھر ہار نہیں مانتا،بڑی سوچ رکھنے والا شخص ہی بڑا آدمی بن سکتا ہے۔