کورونا کی نئی قسم انتہائی خطرناک ، اسد عمر کی شہریوں سے ویکسی نیشن لازمی کروانے کی اپیل

اسلام آباد میں ڈاکٹر فیصل سلطان کے ہمراہ پریس کانفرنس کرتے ہوئے سربراہ این سی او سی اسد عمر نے کہا کہ کورونا کا نیا ویرینٹ انتہائی خطرناک ہے جو دنیا بھر میں پھیل رہا ہے اور پاکستان میں آئے گا، اسے روک نہیں سکتے۔ البتہ آئندہ 2 سے 3 ہفتوں میں ہمیں زیادہ سے زیادہ ویکسینیشن کر کے اس کا خطرہ کم کرنا ہے۔

ان کاکہناتھا کہ اس نئی قسم سے متعلق این سی اوسی نے کچھ فیصلے کیے ہیں، ہائی رسک ایریا میں ٹیسٹنگ کی استعداد بڑھانے کا فیصلہ کیا ہے، اس کے ساتھ کورونا ٹیسٹنگ میں تیزی لانے اور موثر بنانے کا بھی فیصلہ کیا گیا ہے۔

اسد عمر نے کہا کہ پانچ کروڑ پاکستانیوں کی ویکسی نیشن مکمل ہوچکی ہے جبکہ تقریباً تین کروڑ لوگوں کو ویکسین کی ایک خوراک لگی ہے۔ ہائی رسک ایریا میں ٹیسٹنگ کی استعداد بڑھانے کا فیصلہ کیا ہے، کورونا کی نئی قسم کے خلاف ویکسی نیشن ہی بچاؤ کا مؤثر ذریعہ ہے۔ ایسے لوگوں کو ویکسین بوسٹر لگایا جائے گا جن کو کورونا کا زیادہ خطرہ ہے۔

انہوں نے کہا کہ پاکستان میں نئے ویرئینٹ کو کنٹرول کرنے کے لیے اقدامات جاری ہیں ، این سی او سی میں تمام فیصلے مستقبل کو سامنے رکھ کر کیے جائیں گے۔  پاکستان میں ویکسینیشن کے باعث کئی ہفتوں سے کورونا کی شرح کم رہی، کورونا ٹیسٹنگ میں تیزی لانے اور مؤثر بنانے کا فیصلہ کیا ہے، جن تین کروڑ پاکستانیوں نے ایک ڈوز لگوا لی ہے وہ آج ہی دوسری ڈوز لگوائیں، اگلے دو سے تین دن میں ویکسینیشن کی بڑی کمپین شروع کررہے ہیں۔

اسد عمر نے یہ بھی کہا کہ بیرون ممالک سے آنے والوں کے لیے مزید اقدامات کیے جا رہے ہیں،تمام اقدامات کر کے کورونا کی نئی قسم میں کمی لائی جا سکتی ہے۔ ابتدائی رپورٹ کے مطابق باہر سے آنے والوں کیلئے مزید اقدامات کرنے جارہے ہیں، ہم احتیاط کر کے نئے ویرئینٹ کے اثرات کم کرسکتے ہیں، لیکن اسے روک نہیں سکتے۔

ڈاکٹر فیصل سلطان نے کہا ہے کہ دنیا بھر میں کورونا کیسز میں ایک بار پھر اضافہ ہورہا ہے۔ وائرس کی جینیتاتی تبدیلیاں بہت آرہی ہیں یہ زیادہ خطر ناک ہو سکتا ہے۔انہوں نے کہا کہ اومی کرون کے داخلے کو مشکل بنانا مشکل نہیں بلکہ ناممکن ہے، کروڑوں ویکسین لگا چکے، ابھی کروڑوں باقی ہیں۔