پاکستان کو آئی ایم ایف کا غلام بنایا جا رہا ہے، شہباز شریف

قومی اسمبلی میں اپوزیشن لیڈر شہباز شریف نے اظہار خیال کرتے ہوئے کہا کہ  اسپیکر صاحب آپ نے کہا تھا منی بجٹ نہیں آئے گا لیکن میری تمام باتیں درست ثابت ہوئیں۔ پاکستان کو آئی ایم ایف کا غلام بنایا جا رہا ہے۔ پاکستان معاشی تباہی کے دہانے پر پہنچ چکا ہے اور اب یہ منی بجٹ ہمارے دفاعی ایشوز کو بہت پیچھے لے جائے گا۔ اگر عوام کی جیب خالی ہے تو یہ بجٹ جعلی ہے۔

انہوں نے کہا کہ پاکستان کے عوام پر اب تک 1700 ارب روپے کے ٹیکس لگائے جا چکے ہیں۔ منی بجٹ کے ذریعے 350 ارب روپے کے ٹیکس لگائے جا رہے ہیں۔ وفاقی وزیراسد عمر نے منی بجٹ پیش کر کے 400 ارب روپے کے ٹیکس لگائے جبکہ حفیظ شیخ اور شبر زیدی کی جوڑی نے 700 ارب روپے کے ٹیکس لگائے۔حکومت نے یوٹرن میں مہارت حاصل کی اور اب منی بجٹ ملک میں تاریخی مہنگائی لائے گا۔

اپوزیشن لیڈر شہباز شریف کاکہنا ہے کہ اپوزیشن نے فیٹف بل پر ملک کے لیے تعاون کیا، ہم نے تعاون کیا تو جواب میں ہمیں چور اور ڈاکو کہا گیا،کس نے کنٹینر پر کھڑےہو کرکہا تھا کہ بجلی مہنگی ہوتی ہے تو وزیراعظم چور ہوتا ہے، حکومت آئی ایم ایف کے سامنے عوامی مفاد میں کھڑی ہو تو اپوزیشن ساتھ دےگی، حکومت آئی ایم ایف کی شرائط نہ مانے تو ساتھ دیں گے۔