اترپردیش الیکشن سے قبل مودی کو بڑا جھٹکا، 2 وزرا مستعفی

غیر ملکی خبررساں ادارے کے مطابق بھارتی ریاست اتر پردیش میں بھارتیہ جنتا پارٹی کو ایک اور جھٹکا لگا ہے، اسمبلی انتخابات کے قریب آتے ہی ایک دوسرے وزیر نے 24 گھنٹوں کے دوران  کابینہ سے استعفیٰ دے دیا ہے۔ دارا سنگھ چوہان نے بدھ کو اپنا استعفیٰ دیا اور کہا  کہ یوگی آدتیہ ناتھ حکومت ریاست میں نچلی ذاتوں، دلتوں اور دیگر پسماندہ گروہوں کے ساتھ ناانصافی کر رہی ہے۔

چوہان 2017 سے آدتیہ ناتھ  کی کابینہ میں جنگلات اور ماحولیات کے وزیر تھے۔

دوسری جانب  بھارتی جنتا پارٹی  کے لیڈر ایس پی موریا کے خلاف گرفتاری کا وارنٹ جاری کیا گیا تھا –جہنوں نے گزشتہ روز پارٹی چھوڑی تھی - مبینہ نفرت انگیز تقریر کے سات سال پرانے کیس میں  یہ وارنٹ سیتا پور کی ایک عدالت نے جاری کیا تھا لیکن پولیس کی اس کیس میں اچانک دلچسپی کو بی جے پی حکومت کی جانب سے انتقامی کارروائی کے طور پر دیکھا جا رہا ہے۔

منگل کو اتر پردیش میں ایک اور اہم او بی سی لیڈر سوامی پرساد موریہ نے بی جے پی چھوڑ دی تھی۔ ان کے سماج وادی پارٹی میں شامل ہونے کا امکان ہے، حالانکہ اس فیصلے کا سرکاری طور پر اعلان ہونا باقی ہے۔

خیال رہے کہ  اترپردیش کے 11 اضلاع کی 58 نشستوں پر انتخابات 10 فروری کو ہونے جا رہے ہیں تاہم اس سے قبل ہی ارکان اسمبلی کی ایک پارٹی سے دوسری پارٹی میں جانے اور روٹھنے منانے کا سلسلہ شروع ہوگیا۔