اے ٹی سی نے جوہر ٹاؤن بم دھماکے کے مقدمے کا فیصلہ سنا دیا

تفصیلات کے مطابق  انسداد دہشتگری عدالت نے جوہر ٹاؤن بم دھماکے کے مقدمے کا فیصلہ سنا دیا ہے، عدالت نے چار ملزموں کو 9 ،9 مرتبہ سزائے موت کا حکم سنایا ہے، عدالت نے عید گل  ،سجاد شاہ ،پیٹر پال اور ضیاءاللہ کو 9 ۔9 بار سزائے موت کی سزا سنائی ہے جبکہ  خاتون ملزمہ عائشہ کو پانچ سال قید کی سزا سنا دی گئی۔

انسداد دہشتگردی عدالت کے جج ارشد حسین بھٹہ نے کوٹ لکھپت جیل میں مقدمے کا فیصلہ سنایا ،  انسداد دہشتگری عدالت نے سیکیورٹی خدشات کی وجہ سے جیل میں ٹرائل مکمل کیا تھا ۔

ملزمان نے صحت جرم سے انکار کیاتھا، عدالت میں کل 56 گواہوں نے بیانات ریکارڈ کروائے تھے، ملزمان کے خلاف سی ٹی ڈی نے بم دھماکے کا مقدمہ درج کیا تھا۔ ملزمہ عائشہ کی جانب سے رانا فدا حسین اور سرکاری وکیل عبدالروف وٹو نے ٹرائل مکمل کرایا گیا۔

خیال رہے کہ گزشتہ سال 23جون کو لاہور کے علاقے جوہر ٹاؤن میں دھماکے میں 5افراد جاں بحق جبکہ متعدد افراد زخمی ہوگئے تھے، دھماکے سے ایک گھر اور   3 گاڑیاں تباہ ہوگئیں تھیں۔