انسانوں کی ہوبہو نقل اتارنے والا روبوٹ؛ لوگ حیران

سوشل میڈیا پر ایک ویڈیو وائرل ہوئی ہے جس میں ایک روبوٹ کو انسانی تاثرات کی ہوبہو نقل اتارتے ہوئے دکھایا گیا ہے

آپ کہیں موجود ہوں اور سامنے سے کوئی آپ کی نقل وحرکت اور تاثرات کی نقل اتارنے لگے تو آپ جذباتی ہوکر اس سے لڑنے کی غلطی نہ کریں، ہوسکتا ہے کہ آپ کی نقلیں اتارنے والا کوئی شرارتی انسان نہیں بلکہ شریر روبوٹ ہو، کیونکہ یہ دور ترقی کا ہے، ایسی ترقی جس میں نقل اصل کی جگہ لے رہے ہیں۔

جی ہاں ایسا ہی کچھ ان دنوں سوشل میڈیا پر وائرل ہونے والی ایک ویڈیو میں دیکھا جاسکتا ہے۔

تیزی سے گردش کرتی ایک ویڈیو میں بالکل انسان سے مشابہہ چہرہ انسانی تاثرات کی ہوبہو نقل اتارتا دکھایا گیا ہے جس میں آنکھ مارنا، منہ ٹیڑھا کرنا، زبان چڑانا، مسکرانا جیسے تاثرات شامل ہیں۔

? A robot trying to replicate human emotions.pic.twitter.com/JXLZSUkWXu

— EHA News (@eha_news) January 13, 2022

کئی لوگ تو یہ چہرہ دیکھ کر بے وقوف بن گئے اور اسے اصل انسانی چہرہ سمجھ بیٹھے کیونکہ اس روبوٹک چہرے کے بال، جلد، آنکھیں، بھونیں اور تاثرات اتنے حیرت انگیز ہیں کہ نقل پر اصل کا گمان ہوتا ہے۔

یہ روبوٹک چہرہ انسان سے اتنا مشابہہ ہے کہ اگر ویڈیو میں یہ چہرہ حرکت کرتی مشین پر فکس دکھائی نہ دے تو شاید لوگ شناخت ہی نہ کرسکیں کہ یہ انسان نہیں روبوٹ ہے۔

اس ویڈیو کو ایک غیرملکی نیوز ایجنسی نے ٹوئٹر پر پوسٹ کیا ہے اور یہ اتنی مقبول ہوئی ہے کہ اب تک 22 ملین سے زائد افراد اس کو دیکھ اور اپنے تاثرات کا اظہار کرچکے ہیں۔