پنجاب : کورونا سے بچاؤکیلئے شہریوں میں فری ماسک تقسیم کرنے کی مہم کا افتتاح 

تفصیلات کے مطابق  بزدار حکومت نے شہریوں کو کورونا سے محفوظ رکھنے کیلئے ایک اور بڑا قدم اٹھا لیا ، وزیراعلیٰ پنجاب سردار عثمان بزدار نے شہریوں میں فری ماسک تقسیم کرنے کی مہم کا افتتاح کردیا ہے۔   فری ماسک تقسیم کرنے کی تقریب وزیراعلیٰ آفس میں منعقد کی گئی ۔

عثمان بزدار نے صوبائی وزیر صحت ڈاکٹر یاسمین راشد، صوبائی وزیر قانون راجہ بشارت، چیف سیکرٹری اور آئی جی پولیس کو ان کے محکموں کے افسروں اور عملے کیلئے ماسک دیے۔

اس موقع پر وزیراعلیٰ پنجاب سردار عثمان بزدار کا کہنا تھا کہ خصوصی ماسک کورونا اور اسموگ سے بچاؤ کیلئے موثر ثابت ہوں گے۔

عثمان بزدار نے کہا کہ ماسک کا استعمال ہر شہری کو اپنی زندگی کا حصہ بنانا ہوگا، کورونا سے محفوظ رہنے کیلئے ماسک پہننا ضروری ہے ۔ پہلے فیز میں لاہور کے منتخب علاقوں میں فری ماسک تقسیم کرنے کی مہم شروع کی گئی ہے، مرحلہ وار لاہوراورپورے پنجاب میں فری ماسک تقسیم کئے جائیں گے۔

انہوں  نے کہا کہ عوام کو کورونا کی نئی لہر سے بچانے کیلئے ہر ممکن اقدامات کرتے رہیں گے، کورونا سے بچاؤ کیلئے ماسک اورسماجی فاصلہ ناگزیر ہے۔پنجاب کے ہر شہری کو واش ایبل کورونا ماسک مہیا کریں گے جبکہ پوسٹ آفس کے ذریعے گھر گھر تک ماسک پہنچائے جائیں گے۔

انہوں نے کہا کہ یونیورسٹی طلباء کو آگاہی مہم کے لئے انٹرن شپ آفر کریں گے جبکہ اسکولوں کے بچوں کو بھی ترجیحی بنیادوں پر فری ماسک مہیا کیے جائیں گے۔فری ماسک آگاہی مہم کیلئے مذہبی اسکالرز، فنکار اوردیگرعوامی شخصیات فلیگ مارچ بھی کری گے۔

 دوسری جانب صوبائی وزیر صحت ڈاکٹر یاسمین راشد کا کہنا تھا کہ کووڈ کی وجہ سے مشکلات کا سامنا کرنا پڑا،کمشنر لاہور کی فری ماسک مہم قابل تقلید ہے۔

واضح رہے کہ تقریب میں صوبائی وزیر صحت ڈاکٹر یاسمین راشد، صوبائی وزیر قانون راجہ بشارت، ترجمان پنجاب حکومت حسان خاور،چیف سیکرٹری، انسپکٹر جنرل پولیس، پرنسپل سیکرٹری وزیراعلیٰ،سیکرٹری اطلاعات،کمشنر لاہور ڈویژن اورمتعلقہ حکام بھی   موجود تھے۔