’صدراتی نظام کی کوئی حقیت نہیں ایک غبارہ ہے، جس کی جلد ہوا نکل جائے گی‘

وزیرخارجہ شاہ محمود قریشی نے میڈیا سے گفتگو  کرتے ہوئے کہا کہ  صدراتی نظام کی کوئی حقیت نہیں ایک غبارہ ہے، جس کی جلد ہوا نکل جائے گی۔  جنوبی پنجاب صوبہ 70 کی دہائی سے زیر بحث ہے، مگر تحریک انصاف اسے بنانے کے لئے سنجیدہ ہے،  پانچ مرتبہ پی پی اورچار دفعہ ن لیگ نے حکومت کی مگر جنوبی پنجاب صوبہ نہ بن سکا،  جنوبی پنجاب صوبہ کے قیام کے لیے دو تہائی اکثریت درکار ہے عمران خان کی مشاورت سے دوتہائی اکثرت کے لئے بلاول اور شہباز شریف کو خط لکھ دیا ہے  ، خط میں لکھا ہے اگرآپ کی خواہش ہے تو جنوبی پنجاب صوبہ کے لیے مل کر بل اسمبلی میں بھیجتے ہیں۔

وزیرخارجہ  نے کہا کہ  سی پیک منصوبہ سست روی کا شکار نہیں ہے، اور نہ کوئی جھول ہے، کورونا کی وجہ سے ترجیحات تبدیل ہوئیں۔ان کا کہنا تھا کہ او آئی سی کے وزرا خارجہ کے اجلاس سے افغانستان پر عائد پابندیوں کے خاتمہ کے لئے سلامتی کونسل میں بھی قرارداد پیش ہوئی ،  او آئی سی نے افغانستان کے لئے ایک ٹرسٹ قائم کیا، امریکہ نے انسانی ہمدردی کے حوالے سے امداد دینے کا اعلان کیا ہے۔

شاہ محمود قریشی نے مزید کہا کہ  پاکستان تحریک انصاف نے گھروں کے لئے انقلابی اقدامات اٹھائے ہیں ہم نے ایک نئی ہاوسنگ پالیسی کا اجراء کیا،  ہاوسنگ پالیسی کے تحت متوسط طبقہ اور تنخواہ دار طبقہ کو بنک لون بھی دے رہے ہیں وہ اپنے گھر بھی بنا سکیں گے،  ملتان وہاڑی روڈ پبلک پرائیویٹ پارٹنرشپ کے تحت جلد تعمیر کا آغاز ہوگا،  سیمنٹ اور سٹیل کی قیمتیں کنسٹرشن دوبارہ شروع ہونے کی وجہ سے اوپر جارہی ہیں۔