زمبابوین کرکٹر برینڈن ٹیلر کا بھارتی بکیوں سے متعلق تہلکہ خیز انکشاف

تفصیلات کے مطابق برینڈن ٹیلر کا کہنا تھا کہ دو سال سے ذہنی دباؤ کا شکار ہوں، ضروری ہے کہ کہانی سب کو بتاؤں۔

ان کا کہنا تھا کہ 2019 میں بھارتی بزنس مین نے ٹی ٹوئنٹی لیگ کے لیے دعوت دی اور کہا گیا کہ 15 ہزار ڈالر ملیں گے، اس وقت زمبابوے کرکٹ سے تنخواہیں نہیں مل رہی تھیں اس لیے میں نے رضامندی ظاہر کر دی۔

برینڈن ٹیلر کا کہنا تھا کہ بھارت پہنچنے پر مجھے ڈنر پر لے جایا گیا جہاں کوکین کا نشہ بھی کرایا گیا، اگلی صبح چھ افراد میرے کمرے میں داخل ہو گئے، ان افراد نے میری نشہ کرتے ویڈیو دکھا کر مجھے فکسنگ کے لیے بلیک میل کیا۔

ان کا کہنا تھا کہ مجھے اس وقت اپنی حفاظت کا خطرہ تھا، میں نے ہاں کردی اور پھر زمبابوے واپس آ گیا، اس وقت 15 ہزار ڈالرز دیے گئے اور کہا گیا یہ فکسنگ کا ایڈوانس ہے۔

انہوں نے کہا ہے کہ 4 ماہ تک میں شدید دباؤ میں رہا، پھر آئی سی سی سے رابطہ کیا، سوچا کہ آئی سی سی میری مجبوری سمجھے گی مگر ایسا نہ ہوا۔

برینڈن ٹیلر کا مزید کہنا تھا کہ آئی سی سی کو سب تفصیلات بتا دیں، معلوم ہوا ہے وہ مجھ پر پابندی لگانا چاہ رہے ہیں، آئی سی سی کا جو بھی فیصلہ ہو گا قبول کروں گا۔