پب جی گیم پر پابندی عائد کرنے کیلئے لاہور ہائی کورٹ میں درخواست دائر

تفصیلات کے مطابق  لاہور ہائیکورٹ میں دائر درخواست میں وفاقی حکومت، پی ٹی اے اور دیگر کو فریق بنایا گیا ہے اور کہا گیا ہے کہ پاکستان میں پب جی گیم کے منفی اثرات سے کئی ہلاکتیں ہو چکی ہیں۔ درخواست گزار نے مؤقف اختیار کیا ہے کہ گیم کے اثرات کے تحت لاہور میں ایک لڑکے نے ماں اور بہن، بھائیوں کو قتل کر دیا۔

درخواست گزار کا کہنا ہے کہ پب جی کے استعمال سے نوجوان نسل کی ذہنی صحت اور زندگی کو خطرات ہیں، پاکستان میں آن لائن گیمز کو ریگولیٹ کرنے کے لیے کوئی قانون نہیں ہے۔ پڑوسی ملک بھارت میں آن لائن گیمز کو ریگولیٹ کرنے کے لیے باقاعدہ قوانین وضع کیے گئے ہیں۔

درخواست گزار نے استدعا کی ہے کہ لاہور ہائی کورٹ آن لائن گیم پب جی پر فوری پابندی عائد کرنے کا حکم دے۔

دوسری جانب  پنجاب پولیس نے بھی  پب جی گیم کو دیکھ کر قتل کی واردات کے بعد گیم پر پابندی لگوانے کے لیے وفاقی حکومت سے سفارش کرنے کا فیصلہ کیا ہے۔

خیال  رہے کہ رواں ماہ 19 جنوری کو لاہور کے قریب کاہنہ میں خاتون اور تین بچوں کو فائرنگ کرکے قتل کیا گیا تھا، پولیس نے مختلف پہلووں پر تفتیش کرنے کے بعد زندہ بچ جانے والے لڑکے علی زین سے تفتیش کی تو زین نے واردات کا اعتراف کرلیا تھا۔

ملزم نے بتایا تھا کہ وہ پب جی گیم کا شوقین تھا، گیم ہارنے پرافسردہ ہوا اور ملزم نے گھر میں موجود والدہ کے پسٹل سے ماں، بہنوں اور بھائی کو قتل کر دیا ۔ ملزم قتل کرنے کے بعد نشہ میں گھر کے نچلے حصہ میں آکر سوگیا تھا، علی زین فیصل آبادکے قریب گاؤں میں چھپا ہوا تھا۔ابتدائی تفتیش میں علی زین نے بتایا کہ یہ سوچ کر گولیاں چلائیں کہ گیم کی طرح سب دوبارہ زندہ ہوجائیں گے۔