پی ایس ایل 7  کا دوسرامرحلہ، آج ملتان سلطانز اورپشاور زلمی مدمقابل 

لاہور کے قذافی اسٹیڈیم میں ایچ بی ایل پی ایس ایل 7 میں آج سے دوبارہ مقابلوں کا آغاز ہوگا ۔ قذافی اسٹیڈیم میں پی ایس ایل 7 کے دوسرے مرحلے کے پہلے میچ میں پشاور زلمی اور ملتان سلطانزکی ٹیمیں مد مقابل ہوں گی  ۔ یہ میچ رات ساڑھے 7 بجے شروع ہوگا ۔

میچ کے لیے دونوں ٹیمیں ان کھلاڑیوں پر مشتمل ہیں۔

 ملتان سلطانز:

محمد رضوان ( کپتان ) ، شان مسعود، صہب مقصود، رائلی روسو، خوشدل شاہ، ٹم ڈیوڈ، ڈیوڈ ولی، عمران طاہر، عمران خان سینئر، شاہنواز دھانی، احسان اللہ

پشاور زلمی:

وہاب ریاض (کپتان) ، شعیب ملک ، ٹام کوہلر کیڈمور، یاسر خان، حیدر علی، حسین طلعت، شرفین ردرفورڈ، بین کٹنگ، سہیل خان، پیٹ براؤن، ثمین گل اور عثمان قادر

پی ایس ایل میچز دیکھنے کے لئے 15 فروری تک 50 فیصد شائقین اسٹیڈیم آسکیں گے جبکہ فائنل تک 100 فیصد تماشائی اسٹیڈیم میں میچ سے محظوظ ہوں گے لیکن ہر فرد کا ویکسینیٹڈ ہونا لازمی ہے۔ 

پوائنٹ ٹیبل :

پاکستان سپر لیگ 7 میں اب تک تمام ٹیمیں پانچ میچز کھیل چکی ہیں جس کے بعد پوائنٹس ٹیبل پر ملتان سلطانز پہلے اور اسلام آباد یونائیٹڈ دوسرے نمبر پر ہے۔ پوائنٹس ٹیبل پر لاہور قلندرز تیسرے، کوئٹہ گلیڈی ایٹرز چوتھے، پشاور زلمی پانچویں اور اب تک ایک بھی میچ نہ جیتنے والی کراچی کنگز آخری نمبر پر ہے۔

دوسری جانب اس حوالےسے لاہور کی ضلعی انتظامیہ نے ٹیموں کے لئے سیکورٹی کے جامع انتظامات کیے ہیں ۔   لاہور پولیس  کی جانب سے بھی  سکیورٹی و ٹریفک انتظامات مکمل کرلیے گئے ہیں ۔ سربراہ لاہور پولیس کا کہنا ہے کہ میچز سکیورٹی کے لئے پہلے سے زیادہ بہتر حکمت عملی اپنائی ہے ،   فول پروف سکیورٹی انتظامات کے لئے ضلعی انتظامیہ سمیت تمام اداروں سے کوارڈینیشن میں ہیں، آج میچ سکیورٹی پر 08 ہزار سے زاہد پولیس جوان اور لیڈیزاہلکار تعینات ہیں۔  

سربراہ لاہور پولیس  کے مطابق روٹ، اسٹیڈیم، قیام گاہ سمیت اہم مقامات کی سی سی ٹی وی کیمروں سے مانیٹر کی جا رہی ہے ، شائقین کو سکیورٹی و کورونا ایس او پیز چیکنگ کے بعد ہی سٹیڈیم میں داخلے کی اجازت ہوگی، شہریوں کی آگاہی،ٹریفک روانی کے لئے ٹریفک ایڈوائزری جاری کی گئی ہے۔ 

ترجمان سی سی پی او لاہور کے مطابق ٹیموں کے لئے دوران مومنٹ زیرو روٹ، شہری مخصوص اوقات میں متبادل روٹس اختیار کریں،  شائقین کرکٹ کھیل سے لطف اندوز ہونے کیلئے لاہور پولیس کی ہدایات پر مکمل عملدرآمد کریں۔