پی ایس ایل7: ملتان سلطانز کی مسلسل چھٹی فتح

ملتان سلطانز کے 183 رنز کے ہدف کے تعاقب میں پشاور زلمی کی ٹیم 140 رنز بناکر آؤٹ ہوگئی، شعیب ملک 44 رنز بناکر نمایاں رہے۔

قذافی اسٹیڈیم لاہور میں کھیلے گئے میچ میں پشاور زلمی کے کپتان وہاب ریاض نے ٹاس جیت کر ملتان سلطانز کو پہلے بیٹنگ کی دعوت دی۔

ملتان سلطانز نے مقررہ 20 اوورز میں7 وکٹوں پر 182 رنز بنائے، شان مسعود 49 گیندوں پر 68 رنز بناکر نمایاں رہے۔

ملتان سلطانز کے کپتان محمد رضوان 34 گیندوں پر 34 سکور بنا کر وہاب ریاض کا شکار ہو گئے۔

شان مسعود کی اننگز 68 سکور پر ختم ہوئی، انہوں نے اپنی باری میں 8 چوکے اور ایک چھکا لگایا اور سلمان ارشاد کی گیند پر وہاب ریاض کو کیچ دے بیٹھے۔ ریلی روسو 15 سکور پر پویلین لوٹ گئے۔

ٹم ڈیوڈ نے 18 گیندوں پر 34 رنز کی جارحانہ باری کھیلی,وہ بھی کپتان وہاب ریاض کا شکار بن گئے۔

 خوشدل شاہ 11 اور انور علی 1 سکور بنا کر آؤٹ ہوئے، ملتان سلطانز نے مقررہ اوور میں 182 رنز بنائے۔

پشاور زلمی کی جانب سے وہاب ریاض ، ثاقب محمود اور سلمان ارشاد نے دو دو وکٹیں حاصل کیں۔

183 رنز کے ہدف کے تعاقب میں پشاور زلمی کی ٹیم 140 رنز بناکر آؤٹ ہوگئی۔

پشاور زلمی کی جانب سے کامران اکمل 4 اور حیدر علی صرف ایک رنز بناسکے،لیونگسٹن 24 رنز بناکر آؤٹ ہوئے جبکہ  شعیب ملک 44 رنز بناکر ٹیم کا ساتھ چھوڑ گئے۔

بین کٹنگ 23 اور رتھرفورڈ 21 رنز بناکر آؤٹ ہوئے ،ملتان کی جانب سے خوشدل شاہ اور مزربانی نے 3،3 وکٹیں حاصل کی۔