’عوام نے حکومت کو پانچ سال کا مینڈیٹ دیا ہے، پارلیمانی روایات کو پامال نہیں ہونے دیں گے‘

تفصیلات کے مطابق  چیئرمین سینیٹ صاد ق سنجرانی کی  وفد کے ہمراہ چودھری برادران کی رہائش گاہ آمد،چودھری شجاعت اورچودھری پرویزالہیٰ سے ملاقات میں  باہمی دلچسپی  کے امور پربات چیت اس کے علاوہ  ملکی سیاسی صورتحال  اور تحریک عدم اعتماد پر تبادلہ خیال کیاگیا۔

چیئرمین سینیٹ صادق سنجرانی نے کہا کہ چودھری شجاعت حسین منجھے ہوئے سیاستدان ہیں،  چودھری شجاعت کی حالات پر گہری نظر ہے، امید ہے موجودہ حالات میں کوئی راستہ نکال لیں گے۔

اسپیکر پنجاب اسمبلی چودھری پرویز الہی نے اس موقع  پر کہا کہ  عوام نے حکومت کو پانچ سال کا مینڈیٹ دیا ہے، پارلیمانی روایات کو پامال نہیں ہونے دیں گے،  مشاورت کا عمل اور ملاقاتیں جاری رہتی ہیں جو کہ سیاسی عمل کا حصہ ہیں،  فیصلہ سوچ سمجھ کر اپنی پارلیمانی پارٹی سے مشاورت کے بعد ہو گا۔

چودھری پرویزالٰہی کا کہنا تھا کہ  ہر جمہوری حکومت کا حق ہے کہ اسے عوامی خدمت کیلئے دیا گیا عرصہ مکمل کرنے دیا جائے، الیکشن مقررہ وقت پر ہی اچھے لگتے ہیں،  موجودہ سیاسی صورتحال میں ملکی مفاد سب سے زیادہ عزیز ہے۔انہوں نے مزید کہا کہ ملک میں روز بروز بدلتی ہوئی سیاسی آب و ہوا پر پوری نظر ہے،  ہم چاہتے ہیں کہ عوام کو فوری ریلیف دینے کیلئے عملی اقدامات کیے جائیں۔