پاکستان اور آسٹریلیا کے مابین تیسرا اور آخری ٹیسٹ میچ آج لاہور میں شروع ہوگا 

تفصیلات کے مطابق پاکستان اور آسٹریلیا کے درمیان تیسرا ٹیسٹ میچ  21 سے 25 مارچ  تک قذافی سٹیڈیم میں کھیلا جائے گا ۔  میچ صبح 10 بجے شروع ہوگا۔

میچ کےلیے تیاریاں مکمل ہوگئیں جبکہ ٹیموں نے بھرپور ٹریننگ سیشنز بھی کیے، بولنگ بیٹنگ فیلڈنگ کی ڈرلز بھی کیں  اور اپنی تیاریوں کو حتمی شکل دی۔ پاکستان ٹیم کی قیادت بابراعظم کریں گے جبکہ آسٹریلوی ٹیم کو پیٹ کمنز لیڈ کریں گے۔

آسٹریلیا نے تو کراچی میں کھیلنے والی فائنل الیون کو ہی آخری ٹیسٹ کےلیے بھی برقرار رکھا ہے ، البتہ پاکستان کی جانب سے فائنل الیون کا حتمی فیصلہ نہیں کیا گیا ، جو آخری دن وکٹ دیکھ کر کیا جائے گا۔ 

 آسٹریلوی ٹیم لاہور پہنچ چکی ہے اور 24سال بعد آسٹریلین ٹیم کے لاہور آنے پر تمام شائقین کرکٹ بہت خوش ہیں. 

واضح رہے کہ پاکستان اور آسٹریلیا کے درمیان تین ٹیسٹ میچوں کی سیریز کو ’بینو قادر ٹرافی‘ کا نام دیا گیا تھا جس کا پنڈی میں کھیلا جانے والا پہلا اور کراچی میں کھیلا جانے والا دوسرا ٹیسٹ میچ ڈرا ہوگیا تھا۔

دوسری جانب لاہور پولیس نے بھی  سیکورٹی کے فول پروف انتظامات کیے ہیں ،  اس حوالے سے ڈی آئی جی آپریشنز ڈاکٹر عابد خان کاکہنا ہے کہ کھلاڑیوں،انتظامیہ اور شائقین کرکٹ کو بھرپور سکیورٹی فراہم کی جائے گی۔ 8ہزار سے زائد اہلکار ڈیوٹی کے فرائض سر انجام دے رہے ہیں،10ایس پیز،31ڈی ایس پیز،77ایس ایچ اوزتعینات کیے گئے ہیں ۔ 

ڈی آئی جی آپریشنز   کے مطابق  سکیورٹی بارے ایس اوپیز پر من وعن عملدرآمد کروایا جائیگا۔ اس بارے نجی ہوٹل، قذافی اسٹیڈیم،روٹ پرایلیٹ45،ڈولفن204، پی آریوکی107ٹیموں کی پٹرولنگ بھی کی جارہی ہے جبکہ اسٹیڈیم کے گردو نواح،مختلف مقاما ت پرناکہ جات لگائے گئے ہیں۔ 

ڈی آئی جی آپریشنز کے مطابق  شہریوں کو03درجاتی حصار سے گزرنے کے بعد داخلے کی اجازت ہوگی۔ شائقین کرکٹ دورانِ چیکنگ پولیس اہلکاروں سے تعاون کریں ، دوران میچز شہری غیر ضروری سفر سے گریز کریں۔