پاکستان کو خواتین کیلئے محفوظ ملک بنائے بغیر آگے بڑھنا ناممکن ہے: بلاول بھٹو 

تفصیلات کے مطابق  پی پی پی چیئرمین  بلاول بھٹو زرداری نے مانسہرہ میں خاتون اسسٹنٹ کمشنر ماروی ملک شیر پر حملے کی مذمت کرتے ہوئے کہا کہ بدقسمتی ہے کہ ہمارے معاشرے میں ایسی سوچ موجود ہے، جو خودمختار خاتون سے خوفزدہ ہے۔ 

انہوں  نے کہا کہ اس زوال پذیر سوچ سے ہر پاکستانی عورت کو ہر روز کسی نہ کسی شکل میں سامنا کرنا پڑتا ہے۔  خواتین کو خودمختار بنانا پی پی پی کا منشور اور صنفی امتیاز سمیت ہر قسم کے امتیازی سلوک کا خاتمہ نصب العین ہے۔

پی پی پی چیئرمین نے متاثرہ خاتون اسسٹنٹ کمشنر اور ان کے اہلخانہ سے یکجہتی کا اظہار کرتے ہوئے کہا آپ جیسی بہادر اور باصلاحیت خواتین ہی پاکستان کا اصل چہرہ ہیں، قوم کا فخر ہیں ۔

انہوں نے چیف جسٹس پاکستان سے  اس معاملے کا نوٹس لینے اور  خاتون افسر پر حملے میں ملوث ملزمان کو  قرارواقعی  سزا دینے کا مطالبہ کیا ہے۔ 

خیال رہے کہ گزشتتہ روزمانسہرہ میں خاتون اسسٹنٹ کمشنر ماروی شیر ملک  حملے میں زخمی ہو گئیں تھیں ۔ ملزمان نے لیڈی اسسٹنٹ کمشنر کی گاڑی کو کئی بار اوور ٹیک کیا، ملزمان خاتون اسسٹنٹ کمشنر کی تصاویر اور ویڈیو بھی بناتے رہے اور پھر غازی کوٹ میں 3 افراد نے ان پر حملہ کر دیا۔

ملزمان نے اسسٹنٹ کمشنر کے گارڈ پر تشدد کرکے اس کا بازو توڑ دیا جبکہ موقع پر موجود افراد نے تینوں ملزمان کو پکڑ کر پولیس کے حوالے کر دیا۔

اسسٹنٹ کمشنر ماروی شیر ملک کی درخواست پر تھانا سٹی میں ملزمان کے خلاف مقدمہ درج کرلیا گیا ہے اور پولیس نے واقعے کی  تحقیقات کا آغاز بھی کر دیا ۔