لاہور ٹیسٹ:قومی ٹیم پہلی اننگز میں 268 رنز پر ڈھیر

قذافی اسٹیڈیم میں کھیلے جارہے ٹیسٹ سیریز کے تیسرے اور آخری میچ میں  آسٹریلیا کے 391 رنز کے جواب میں قومی ٹیم  268 رنزپرآؤٹ ہوگئی اور اب آسٹریلیا کی دوسری اننگز میں بیٹنگ جاری ہے۔

مہمان ٹیم کو پاکستان کے خلاف  پہلی اننگزمیں 123 رنزکی برتری حاصل ہوگئی ہے۔

پاکستان کی جانب سے عبداللہ شفیق نے 81، اظہر علی نے 78  اور کپتان بابراعظم نے 67 رنز بنائے، ان کے علاوہ فوادعالم 13، امام الحق11 اور ساجد خان 6 رنز بناکر آؤٹ ہوئے، محمد رضوان ایک رن بنا سکے جب کہ نعمان علی،حسن علی اور نسیم شاہ صفر پرپویلین لوٹ گئے۔

 آسٹریلیا کی جانب سے کپتان پیٹ کمنز نے 5  وکٹیں حاصل کیں جب کہ مچل اسٹارک نے 4 اور نیتھن لائن نے ایک کھلاڑی کو آؤٹ کیا۔

خیال رہے کہ آسٹریلوی ٹیم اپنی پہلی اننگز 391 رنز بنا کر آل آؤٹ ہوئی تھی، پاکستان کی جانب سے نسیم شاہ اور شاہین آفریدی نے 4 ، 4 کھلاڑیوں کو آؤٹ کیا تھا جب کہ نعمان علی اور ساجد خان ایک ایک وکٹ لینے میں کامیاب رہے تھے۔