قومی اسمبلی اجلاس : تحریک انصاف نے وزیراعظم کے انتخاب کا بائیکاٹ کردیا 

تفصیلات کے مطابق   قومی  اسمبلی کا اجلاس ڈپٹی اسپیکر قومی اسمبلی قاسم سوری کی زیر صدارت شروع ہوا جس میں قاسم سوری  نے پہلے اپنی رولنگ پر بات کرتے ہوئے اسی آئینی و قانونی قرار دیا جبکہ قاسم سوری نے مبینہ دھمکی آمیز خط بھی ایوان میں لہرایا۔

قاسم سوری کا کہنا تھا کہ وفاقی کابینہ کے آخری اجلاس میں فیصلہ کیا گیا کہ مراسلہ ڈی کلاسیفائیڈ کیا جائے، میں وفاقی کابینہ کی اجازت سے ڈی کلاسیفائیڈ مراسلہ قومی اسمبلی کی جانب سے چیف جسٹس سپریم کورٹ کو سِیل کرکے بھجوارہا ہوں۔

بعد ازاں شاہ محمود قریشی نے  طویل تقریر کرتے ہوئے وزیراعظم کے انتخابی عمل کا بائیکاٹ اور اسمبلی سے مستعفی  ہونے کا اعلان کیا۔

وزارت عظمٰی کے لیے نامزد امیدوار شاہ محمود قریشی نے اسمبلی سے خطاب کرتے ہوئے کہا آج کوئی کامیاب ہو گا اور کوئی آزاد ہو گا، آج قوم کے سامنے دو راستے ہیں، جن میں سے ایک کو اختیار کرنا ہے۔ان کے مطابق ایک راستہ غلامی کا ہے اور دوسرا خودی کا ہے۔ انہوں نے حکومتی بینچوں کی طرف اشارہ کرتے ہوئے کہا یہ ایک غیر فطری اتحاد ہے۔

شاہ  محمود قریشی  کی تقریر کے بعد پی ٹی آئی ارکان ایوان سے نعرے لگاتے ہوئے  بائیکاٹ کرگئے، قائم مقام سپیکر قاسم سوری نے بھی اجلاس کی صدارت سے انکار کر دیا جس کے بعد صدارت ایاز صادق کے حوالے کر دی گئی ہے۔