وزیر اعظم ایک روزہ دورے پر کراچی پہنچ گئے ، مزار قائدؒ پر حاضری دی اور فاتحہ خوانی کی

کراچی : وزیراعظم شہباز شریف اپنے پہلے ایک روزہ دورے پر صوبائی دارالحکومت کراچی پہنچ گئے ، جہاں انہوں نے بابائے قومؒ کے مزار پر حاضری دی ، پھولوں کی چادر چڑھائی اور فاتحہ خوانی کی ۔ 

  خصوصی پرواز نے شارع فیصل پر پاکستان ائیر فورس کے فیصل ائیر بیس پر لینڈ کیا جہاں وزیراعلیٰ سندھ سید مراد علی شاہ اور دیگر  نے وزیراعظم شہباز شریف کا استقبال کیا،فیصل ائیر بیس سے وزیراعلیٰ سندھ وزیراعظم کو ہیلی کاپٹر میں لے کر وزیراعلیٰ ہاؤس کے لیے روانہ ہوئے۔ وزیراعلیٰ ہاؤس کے قریب ہیلی پیڈ پر چیف سیکرٹری سندھ اور انسپکٹر جنرل پولیس سندھ نے وزیراعظم کا استقبال کیا۔

وزیر اعظم شہباز شریف وزیر اعلیٰ سندھ  و دیگر کے ہمراہ مزار قائدؒ پہنچے  اور حاضری دی ، اس موقع پر  وزیر اعظم نے ملکی سلامتی و ترقی کیلئے خصوصی دعا کی جبکہ مہمانوں کی کتاب میں تاثرات بھی قلمند کئے ۔

 مزار قائد ؒ پر حاضری کے بعد وزیراعظم  وزیراعلیٰ ہاؤس سندھ جائیں گے جہاں وہ وزیر اعلیٰ سید مراد علی شاہ، صوبائی وزراء، سیکرٹریز اور دیگر رہنماؤں کے ہمراہ کراچی میں ترقیاتی منصوبوں سے متعلق مشاورتی اجلاس کی صدارت کریں گے۔ اس کے علاوہ سندھ میں امن و امان سے متعلق اجلاس بھی وزیراعلیٰ ہاؤس میں ہوگا۔

اپنے دورہ کراچی کے تیسرے مرحلے میں وزیر اعظم شہباز شریف حکومتی اتحاد میں اپنی اہم پارٹنر ایم کیو ایم پاکستان کی قیادت سے پارٹی کے مرکزی دفتر بہادرآباد کا دورہ بھی کریں گے جس کے بعد وزیراعظم آج شام ہی دارالحکومت اسلام آباد واپس چلے جائیں گے۔