سعادت حسن منٹو کا  110واں یوم پیدائش 

سعادت حسن منٹو 11 مئی 1912کو لدھیانہ میں پیدا ہوئے، منٹو نے علی گڑھ سے ابتدائی تعلیم حاصل کی اور مصنف کی حیثیت سے عملی زندگی کا آغاز کیا۔ 1931 میں پہلا افسانہ "تماشا" لکھا جو سانحہ جلیانوالہ باغ کے متعلق تھا  ۔

سعادت حسن منٹو صحافت کے علاوہ  ریڈیو ، فلموں اور ڈراموں سے بھی وابستہ رہے  لیکن ان کی شہرت کی اصل وجہ ان کے افسانے بنے۔ انہوں نے اپنے افسانوں کی مدد سے معاشرے کی  تلخ حقیقتوں کو سب کے سامنے رکھا۔ 

سعادت حسن منٹونے اپنے جذبات اور احساسات کو لفظوں کے موتی پرو کر ہمیشہ کے لئے امرکردیا۔ منٹو  نے ٹوبہ ٹیک سنگھ، ٹھنڈا گوشت، دھواں اور آتش پارے   سمیت کئی   بہترین افسانے  تخلیق کیے  ۔ ان کے افسانے نہ صرف اردو ادب کا بیش قیمت سرمایہ ہیں بلکہ ان کی سب تحریریں ہی  بشمول افسانے، مضامین اور خاکے اردو ادب میں بےمثال حیثیت کے حامل ہیں۔

سعادت حسن منٹو کے افسانے صرف واقعات پر  ہی منحصر نہیں  تھے  ۔ انہوں نے اپنی تحریروں کے ذریعے معاشرےکے بدبودار پہلؤؤں کو اجاگر کیا۔  ان کی بے باک تحریروں کو  تنقید کا نشانہ   بھی بنا یا گیا  اور ان کے کئی افسانوں پر مقدمے  بھی چلے  جس کی     وجہ سے  انہیں  6 بار جیل کی ہوا بھی کھانا پڑی ۔ وہ ادب برائے زندگی کے قائل تھے جن کی کہانیوں میں دکھی انسان چلتے پھرتے دکھائی دیتے ہیں۔

سعادت حسین  منٹو نے 1932  سے 1955 تک  اپنے 23 سالہ  ادبی کرئیر میں 241  افسانے ،59 ڈرامے ،ایک ناول ، 51 آرٹیکل  اور 29 ترجمے  تحریر کیے ۔

منٹو1948 میں ہندوستان سے ہجرت کرکے لاہورآگئے اور باقی زندگی یہیں بسر کی۔شدید تنقید اورملامتوں کا سامنا کرنے والےمنٹو کی ادبی عظمتوں کا بالآخر دنیا کو اعتراف کرنا پڑا ۔ان کے نام کے جہاں ڈاک ٹکٹ جاری  ہوئے بلکہ نشان امتیاز کے حق دار بھی ٹھہرے۔

افسانہ نگاری  کے اس  بےتاج بادشاہ  نے زندگی کی صرف 42 بہاریں دیکھیں مگر اپنی تحریروں سے صدیوں کی زندگی پا گئے ۔