حیدرآباد کے قریب رحمان بابا ایکسپریس کو حادثہ

پشاور سے کراچی جانے والی رحمان بابا ایکسپریس کو حیدرآباد بولاری ریلوے اسٹیشن کے قریب حادثہ پیش آیا جہاں رحمان بابا ایکسپریس کی تین بوگیاں اورانجن پٹری سے اتر گئے ۔  حادثے کے بعد ٹریک پر ٹرینوں کی آمدو رفت روک دی گئی ہے۔

ریلوے انتظامیہ کے مطابق حادثے کے بعد فوری طور پر امدادی ٹیموں کو طلب کرلیا ،  فوری طور پر کسی جانی نقصان کی اطلاع نہیں ملی ہے اور حادثے کی وجہ بھی فوری طور پر سامنے نہیں آسکی  ہے۔

ڈی سی او ریلوے کراچی اسحاق بلوچ  نے  اس حوالے سے کہا کہ حادثے میں تمام مسافر محفوط رہے ، امدادی ٹرین جائے حادثہ پر پہنچ چکی ہےجبکہ  تمام مسافروں کو ریسکیوٹرین سے منزل مقصود پر پہنچایا جائے گا۔ 

ذرائع  کے مطابق حادثہ ڈرائیور کی تیزی رفتاری کے باعث پیش آیا،   کراچی سے کوٹری تک ٹریک خستہ حال ہو چکا  ہے،  ڈرائیور نے ہدایات کے باوجود رفتار  زیادہ رکھی جس کی وجہ سے ٹرین بے قابو ہوئی ۔

خیال رہے کہ سابقہ وزیر ریلوے نے ٹریک تبدیل کرنے کے لیے 31 ارب کی  گرانٹ وفاقی حکومت سے طلب کی تھی ، تاہم حکومت نے ایم ایل ون کو جواز بنا کر انکار کر دیا تھا۔