انڈونیشیا: سیاحوں کی بس کو حادثہ ، 14 افرادہلاک  

غیر ملکی خبر رساں ادارے کے مطابق کے  مغربی جاوا کے شہر میں سیاحوں سے بھری بس  کھمبے سے جا ٹکرائی جس کے نتیجے میں 14 افراد ہلاک  اور 12 سے زائد زخمی ہوگئے ۔

حادثہ ملک کے دوسرے بڑے شہر  سورابایا کو ضلع  موجو موجوکرٹو  سے ملانے والی  سڑک پر پیش آیا ۔  بس میں  ڈرائیور اور عملے کے  ایک رکن سمیت 31 مسافر سوار تھے  ۔

مقامی  اہلکار  نے خبر ایجنسی کو بتایا کہ متاثرین کا تعلق سورابایا کے قریبی  گاؤں بینوو سے تھا، جو کہ  وسطی جاوا میں تقریباً 400 کلومیٹر دور مشہور  سیاحتی مقام پر تعطیلات گزار کر گھر واپس جا رہے تھے۔

قبل ازیں مشرقی جاوا پولیس کے ترجمان نے حادثے کا ذمہ دار ڈرائیور کو قرار دیا۔

پولیس  رپورٹ میں بتایا گیا ہے کہ پیر کی صبح جب حادثہ پیش آیا تو موسم اور ٹریفک دونوں صاف تھے تاہم ڈرائیور کی غفلت کے باعث یہ واقعہ پیش آیا ۔  پولیس کے مطابق  ڈرائیور کو زخمی حالت میں ہسپتال منتقل کردیا گیا ہے ۔ 

انڈونیشیا میں جان لیوا ٹریفک حادثات عام ہیں، یہاں  گاڑیوں کی ناقص دیکھ بھال   اور سڑک کے قوانین کو معمول کے مطابق نظر انداز کیا جاتا ہے۔

پولیس  کے مطابق گزشتہ ماہ  بھی  مغربی پاپوا صوبے میں کان کنوں کو لے جانے والا ٹرک ایک پہاڑ سے جاٹکرایا تھا جس کے نتیجے میں16 افراد ہلاک ہو گئے تھے۔