حکومت نے معاشی ایمرجنسی نافذ کر دی، متعدد اشیاء کی درآمد پر پابندی عائد

اسلام آباد میں پریس کانفرنس کرتے ہوئے مریم اورنگزیب نے کہا کہ پاکستان سے مہنگائی کو ختم کرنا مسلم لیگ ن کے منشور میں شامل ہے، 4 ہفتوں کی حکومت سے سوال کرنے والوں کو شرم آنی چاہیے۔

انہوں نے کہا کہ معاشی ایمرجنسی کی بنیاد پر لگژری آئٹمز کی درآمد پرپابندی لگائی گئی ہے،عمران حکومت نے جس معاہدے پر دستخط کیے وہ مہنگائی کی وجہ ہیں، مسلم لیگ ن واحد جماعت ہے جس نے 2015ء میں آئی ایم ایف کے پروگرام کو مکمل کیا۔

انہوں نے کہا کہ حکومتی فیصلے کے مطابق پاکستان کی تاریخ میں پہلی دفعہ تمام لگژری آئٹمز کو بین کیا جا رہا ہے، تمام وہ آئیٹمز جو لگژری آئٹمز ہیں جن کو غیر ضروری کہا جاتا ہے ان کی امپورٹ پر مکمل بین لگا دیا گیا ہے، بین کی گئی چیزوں میں فوڈ آئیٹمز، تزئین و آرائش کی تمام چیزیں اور تمام قسم کی امپورٹڈ گاڑیاں شامل ہیں۔

مریم اورنگزیب نے بتایا کہ حکومت کی جانب سے میک اپ، ٹشو پیپرز،جیم، جیولری، چمڑا، چاکلیٹ، جوسز، سگریٹ سمیت بڑی گاڑیوں اور موبائل فونز کی درآمد پر مکمل پابندی لگا دی گئی ہے، علاوہ ازیں امپورٹڈ کنفیکشنری، کراکری، فرنیچر، فش، فروزن فوڈ، فروٹ، ڈرائی فروٹ کی امپورٹ پر بھی پابندی عائد کردی گئی ہے۔

حکومتی ترجمان نے کہا کہ آج ملک ایک مشکل مرحلے سے گزر رہا ہے، گزشتہ حکومت کے غلط معاشی پالیسیوں کے باعث تمام لگژری آئیٹمز کی امپورٹ پر پابندی عائد کی گئی ہے۔