ادارہ ملکی سلامتی اور خودمختاری کے حوالے سے اپنی ذمہ داریاں پوری کرے گا:آرمی چیف

پاک فوج کے شعبہ تعلقات عامہ کی جانب سے جاری بیان کے مطابق جی ایچ کیو میں آرمی چیف جنرل قمر جاوید باجوہ کی زیر صدارت 80 ویں فارمیشن کمانڈرز کانفرنس کا انعقاد کیا گیا، کانفرنس میں کور کمانڈرز، پرنسپل سٹاف آفیسرز اور پاکستان آرمی کے تمام فارمیشن کمانڈرز نے شرکت کی۔

جاری بیان کے مطابق فارمیشن کمانڈرز کانفرنس کے شرکاء کو پیشہ ورانہ امور، قومی سلامتی کے چیلنجز اور جوابی اقدامات پر بریفنگ دی گئی۔

اس دوران آرمی چیف جنرل قمر جاوید باجوہ نے آپریشن ردالفساد میں ہونے والی اب تک کی پیش رفت پر اطمینان کا اظہار کیا اور کامیابیوں کو سراہا۔

ترجمان پاک فوج کے مطابق آرمی چیف نے جیو اسٹریٹجک ماحول کو تیار کرنے سے متعلق آپریشنل تیاری کے اعلیٰ معیار کو برقرار رکھنے پر خصوصی زور دیا۔