کیلیفورنیا :  امریکی فوجی طیارہ گر کر تباہ 

 امریکی میرین کور کے ترجمان کے مطابق جنوبی کیلیفورنیا میں پانچ امریکی میرینز کو لے جانے والا فوجی طیارہ گر کر تباہ ہو گیا۔

  خبر رساں ایجنسی کے مطابق ہلاکتوں کے بارے میں فوری طور پر کچھ نہیں بتایا گیا۔

امریکی میڈیا کے مطابق ایم وی 22 بی اوسپرے نامی طیارہ امپیریل کاؤنٹی میں ہائی وے کے قریب گرا، جہاں ملبے سے صرف چار لاشیں ملیں، پانچویں کی تلاش جاری ہے ۔ امپیریل کاؤنٹی کے حکام نے خدشہ ظاہر کیا ہے کہ پانچواں فوجی بھی حادثے میں ہلاک ہو گیا ہے۔

امریکی فوج نے وضاحت جاری کی ہے کہ طیارے میں ایٹمی مواد موجود ہونے کی اطلاعات درست نہیں ہیں۔

اس حوالے سے ایک ترجمان  کاکہنا تھا کہ  ہم اس بات کی تصدیق کر سکتے ہیں کہ تھری ڈی میرین ایئر کرافٹ ونگ کا ایک طیارہ گلیمس کے قریب گر کر تباہ ہوا۔  طیارے میں بحریہ کے پانچ فوجی سوار تھے، اور ہم عملے کے تمام ارکان کی حالت کی تصدیق کے منتظر ہیں۔

حادثے کی وجہ معلوم کرنے کے لیے تحقیقات کی جا رہی ہیں۔ 

یاد رہے کہ رواں برس  امریکی فوج  کو  متعدد فضائی حادثات  پیش آئے ہیں ، مارچ میں ناروے میں ایک فضائی حادثے میں بحریہ کے چار فوجی ہلاک ہو گئے تھے۔