صدر مملکت نے نیب ترمیمی بل بھی بغیر دستخط واپس کردیا

تفصیلات کے مطابق صدر مملکت نے نیب ترمیمی بل دستخط کے بغیر واپس بھیجتے ہوئے کہا کہ میں خود کو اللہ تعالیٰ کے سامنے جوابدہ سمجھتا ہوں، اس سے معافی کا طلب گار رہتا ہوں، میرا ضمیر مجھے احتساب ترمیمی بل پر دستخط کرنے کی اجازت نہیں دیتا۔

انہوں نے کہا کہ جو اقوام ایسے قوانین اپناتی ہیں وہ نہ صرف عام آدمی کے استحصال کا مؤجب بنتی ہیں بلکہ معاشرے میں ناانصافی کے فروغ کا بھی باعث بنتی ہیں، اس طرح کے کمزور قوانین انصاف کے لبادے میں بدعنوان اشرافیہ کے جرائم پر پردہ ڈالتے ہیں، یہ امر افسوسناک ہے کہ ادارے کے بنیادی ڈھانچے میں بہتر ی لانے کی بجائے بغیر کسی متبادل نظام کے احتساب کے عمل کو ہی زمین بوس کر دیا جائے، یہ عمل احتساب کے عمل کو غیر مؤثر بنانے اور استحصالی اداروں اور نظام کو فروغ دینے کے مترادف ہیں۔

صدر مملکت نے کہا کہ ان کے خیال میں پارلیمنٹ سے منظور شدہ یہ بل رجعت پسندانہ نوعیت کا ہے،یہ بل بدعنوان عناصر کے لیے واضح پیغام ہے کہ وہ کسی کو بھی جوابدہ نہیں اور بلاخوف و خطر اپنی لوٹ مار جاری رکھ سکتے ہیں، اس سے کمزور آدمی معمولی جرائم میں بھی پکڑا جائے گا جب کہ با اثر بدعنوان عناصر کو قوم کا خون چوسنے کی کھلی آزادی مل جائے گی۔