کورونا وائرس کی بڑھتی شرح :  این سی اوسی کے سرکاری دفاتر کیلئے نئے اصول جاری

ترجمان وزارت صحت کے مطابق  این سی او سی کی جانب سے جاری کیے گئے نئے اصولوں میں کہا گیا ہے کہ کورونا وائرس سے بچاؤ کے طریقہ کار پر سختی سے عمل کیا جائے ، دفتر سمیت ہر جگہ بیٹھنے کے دوران سماجی فاصلہ رکھا جائے، عبادت، نمازوں کے دوران بھی سماجی فاصلے کو یقینی بنایا جائے۔

ترجمان وزارت صحت کے مطابق دفاتر کے داخلی راستوں اور واش رومز میں ہینڈ سینٹائزرز موجود ہونے چاہئیں، تمام دفاتر، عمارتوں کے داخلی راستوں پر لوگوں کا ٹمپریچر چیک کیا جائے اور کورونا وائرس کی علامات رکھنے والوں کو دفاتر، عمارتوں میں داخل نہ ہونے دیا جائے۔

ترجمان  کے مطابق نزلہ، زکام، سانس لینے میں مشکل کی صورت میں کورونا وائرس کی تشخیص کے لیے پی سی آر یا اینٹی جن ٹیسٹ کروائے جائیں۔

واضح رہے کہ  پاکستان میں کورونا سے  اموات اور کیسز کی شرح میں ایک بار پھر اضافہ دیکھنے میں آرہا ہے  ، گزشتہ 24 گھنٹے کے دوران کورونا    مثبت کیسز کی شرح 4 فیصد سے تجاوز کرگئی ۔  

قومی ادارہ صحت کی جانب سے جاری کیے گئے تازہ اعداد و شمارکے مطابق  ملک میں کورونا وائرس کی  نئی لہر  کے دوران 818 نئے کیسز رپورٹ ہوئے  جبکہ 4 مریض انتقال کرگئے ۔ 

پاکستان میں گزشتہ چوبیس گھنٹوں  کے دوران کوروناکے18ہزار305ٹیسٹ کیےگئےہیں ، کورونا کا شکار  126 مریضوں کی حالت تشویشناک ہے۔ 

دوسری جانب پاکستان میں کورونا وبا کے کیسز میں ایک بار پھر اضافہ ہونے کے سبب ہوائی سفر، پبلک ٹرانسپورٹ میں  ماسک لگانے کی پابندی دوبارہ عائد کر دی گئی ہے۔