مایہ ناز آسٹریلوی عثمان خواجہ کا انٹرنیشنل کرکٹ سے ریٹائرمنٹ کا اعلان

سڈنی: آسٹریلوی کرکٹ ٹیم کے معروف بائیں ہاتھ کے بیٹر عثمان خواجہ نے انٹرنیشنل کرکٹ سے ریٹائرمنٹ کا اعلان کر دیا۔

خبر ایجنسی کے مطابق اپنے ایک بیان میں آسٹریلوی کرکٹر کا کہنا تھا کہ ایشز کے 5ویں اور آخری ٹیسٹ کے بعد ریٹائر ہو جاؤں گا، انگلینڈ کے خلاف آخری ٹیسٹ اتوار سے شروع ہوگا، جس میں عثمان خواجہ 88واں اور آخری میچ کھیلیں گے۔

واضح رہے کہ عثمان خواجہ کا ٹیم میں بحیثیت اوپنر رول ختم ہو چکا ہے،ان کی جگہ ٹریوس ہیڈ اوپننگ کر رہے ہیں، 39 سالہ عثمان خواجہ 87 ٹیسٹ، 40 ون ڈے اور 9 ٹی 20 میچز میں آسٹریلیا کی نمائندگی کر چکے ہیں۔

ریٹائرمنٹ کے اعلان کے بعد میڈیا سے گفتگو میں انہوں نے جذباتی انداز میں کہا کہ میں پاکستان سے تعلق رکھنے والا مسلمان لڑکا ہوں جسے کہا گیا تھا کہ وہ کبھی آسٹریلیا کے لیے نہیں کھیلے گا… آج مجھے دیکھ لیں۔

عثمان خواجہ نے کہا کہ ایشز سیریز کے لیے ان کی تیاری پر سوال اٹھائے گئے اور انہیں یہ سننے کو ملا کہ وہ ٹیم کے لیے سنجیدہ نہیں ہیں۔ ان پر الزام لگایا گیا کہ انہوں نے ٹیسٹ میچ سے ایک دن پہلے گالف کھیلی، ٹریننگ سے گریز کیا اور انہیں خودغرض اور سست قرار دیا گیا۔

خیال رہے کہ گزشتہ کچھ دنوں سے عثمان خواجہ سے متعلق ان کے مستقبل کے حوالے سے فیصلہ کرنے کی خبریں گردش کر رہی تھیں۔

عثمان خواجہ سیریز کے پہلے پرتھ ٹیسٹ سے کمر کی تکلیف کا شکار ہونے کی بعد تنقید کا شکار ہوگئے تھے، وہ کمر کی تکلیف کے باعث برسبین ٹیسٹ میں حصہ نہیں لے سکے تھے جبکہ ایڈیلیڈ ٹیسٹ سے انہیں ڈراپ کر دیا گیا تھا۔