محکمہ موسمیات نے نئے اسپیل سے متعلق ایڈوائزری جاری کردی

تفصیلات کے مطابق محکمہ موسمیات نے نئے اسپیل سے متعلق ایڈوائزری جاری کرتے ہوئے کہا ہے کہ سینٹرل انڈیا پر موجود سسٹم سندھ میں 14جولائی کو داخل ہو گا، مون سون کے دوسرے اسپیل  سے پانچ روز تک کراچی سمیت سندھ میں بارشیں متوقع ہیں۔

محکمہ موسمیات کے مطابق 14 جولائی سے اٹھارہ جولائی تک کراچی سمیت سندھ میں گرج چمک کے ساتھ تیز بارش کا امکان ہے، یہ اسپیل پچھلے اسپیل سے زیادہ طاقتور ہے 

بتایا گیا ہے کہ نئے اسپیل میں کراچی، حیدراباد، ٹھٹہ، بدین، میرپور خاص، عمر کوٹ، تھرپارکر، ٹنڈو محمد خان، ٹنڈو الہیار، سانگڑ، نواب شاہ سمیت بالائی سندھ میں تیز بارشیں متوقع ہیں، اس اسپیل میں شہر سمیت سندھ میں سیلابی صورت حال کا خد شہ ہے۔

چیف میٹرولوجسٹ سردار سرفراز کا کہنا ہے کہ کراچی کے جنوب میں اور شمال مشرقی بحیرہ عرب کے اوپر بادل بن رہے ہیں، کراچی، ٹھٹھہ، بدین، تھرپارکر، میرپور خاص اور عمرکوٹ کے اضلاع میں شام/رات میں گرج چمک کے ساتھ بارش کا امکان۔