دنیا بھر میں دوستی کا عالمی دن آج منایا جارہا ہے

یوں  تو ہر رشتہ اہم خوبصورت اور ضروری ہے ،لیکن دوستی کا رشتہ سب سے زیادہ خوبصورت اور پائیدار ہے ۔ انسان کی صحبت یا اس کے دوست انسان کی پہچان ہوتے ہیں ، دوستوں کی صحبت کسی انسان کے نظریات و خیالات اور شخصیت کی تعمیر میں اہم کردار ادا کرتی ہے۔ 

کسی انسان کی زندگی میں دوست نہایت اہمیت رکھتے ہیں ،  دوستی انسان کے عزیز ترین رشتوں میں سے ایک ہے اور دنیا میں اصل غریب تو وہ ہے کہ جس کے پاس کوئی مخلص دوست نہیں ہے۔

آج کی تیزرفتار زندگی میں یہ دن یوں بھی کافی اہمیت کا حامل ہے کہ اس دن دوستوں کو آپس میں مل بیٹھنے کا بہانہ مل جاتا ہے تاکہ اس انمول رشتے کو مزید تقویت دی جاسکے۔

بات کی جائے " ورلڈ فرینڈشپ ڈے"  کی تو اس دن کو منانے کا باقاعدہ آغاز 1958ء میں پیراگوائے سے ہوا لیکن بعد میں یہ دن دنیا بھر میں مقبولیت حاصل کر گیا۔

27 اپریل 2011ء کو اقوام ِمتحدہ کی جنرل اسمبلی نے اس دن کو ہر سال باقاعدگی کے ساتھ منانے کا فیصلہ کیا۔

دنیا بھر کی طرح پاکستان میں بھی لوگ اس خوبصورت دن کے موقع پر اپنے دوستوں کو تحفے تحائف اور پیغامات بھیجتے ہیں۔