اڈیالہ جیل انتظامیہ نے شہباز گل کو اسلام آباد پولیس کی تحویل میں دے دیا

میڈیا رپورٹ کے مطابق اسلام آباد کی مقامی عدالت کی جانب سے پاکستان تحریک انصاف کے رہنما شہباز گل کے ریمانڈ کے معاملے پر اسلام آباد اور پنجاب پولیس میں ٹھن گئی  جبکہ وزارت داخلہ کی جانب سے رینجرز طلب کیے جانے کے بعد اڈیالہ جیل انتظامیہ نے گِل کو اسلام آباد پولیس کی تحویل میں دے دیا۔

ایڈیشنل سیشن جج زیبا چوہدری نے جوڈیشل مجسٹریٹ کے شہباز گل کو جیل بھیجنے کے فیصلہ کے خلاف وفاقی حکومت کی درخواست منظور کرتے ہوئے انہیں دو روزہ جسمانی ریمانڈ پر اسلام آباد پولیس کے حوالے کرنے کا حکم دیا تھا۔

ایڈیشنل سیشن جج کے فیصلے کے بعد پولیس ٹیم تفتیشی افسر کی نگرانی میں شہباز گل کو لینے اڈیالہ جیل پہنچی، تاہم پنجاب حکومت نے طبیعت خرابی کے باعث شہبازگل کو ڈی ایچ کیو اسپتال راولپنڈی منتقل کرنے کا فیصلہ کیا گیا تھا جبکہ ذرائع کا کہنا ہے کہ انہیں ڈی ایچ کیو اسپتال کے آئی سی یو وارڈ منتقل کیا جانا تھا، ان کی اسپتال منتقلی کیلئے ایم ایس ڈی ایچ کیو اسپتال بھی اڈیالہ جیل پہنچ گئی تھی۔

جیل ذرائع کا کہنا تھا کہ شہبازگل کو سانس لینے میں دشواری کا سامنا ہے اور ان آکسیجن لیول بھی کم ہے، بیماری میں جسمانی ریمانڈ پر اسلام آباد پولیس کے حوالے نہیں کیا جاسکتا۔

دوسری جانب راولپنڈی پولیس اور راولپنڈی ایلیٹ فورس اسکواڈ بھی اڈیالہ جیل کے باہر موجود تھیں، راولپنڈی پولیس نے پی ٹی آئی رہنما کو ڈی ایچ کیو اسپتال منتقل کرنے پر اصرار کیا تھا جبکہ اسلام آباد پولیس نے عدالتی حکم کے تحت شہبازگل کو اسلام آباد منتقل کرنے پر اصرار کیا۔

اسلام آباد پولیس کا کہنا ہے کہ ملزم کا چیک اپ پمز اسپتال کی میڈیکل ٹیم کو کرنے دیا جائے، جیل انتظامیہ کا موقف ہے کہ جیل اسپتال کے ڈاکٹرز موجود ہیں، پمز اسپتال کی میڈیکل ٹیم کس حیثیت میں چیک اپ کرے گی۔