وزیراعظم کا آزاد کشمیر میں 9 فوجی جوانوں کی شہادت پر افسوس کا اظہار

ذرائع کے مطابق وزیراعظم شہبازشریف نے اپنے ایک بیان میں حادثے میں شہید ہونے والے  9 فوجی جوانوں کے اہل خانہ سے ہمدردی کا اظہار کیا ہے۔

شہباز شریف نے کہا کہ 'مادر وطن کے دفاع کا عظیم فرض نبھاتے شہید بیٹوں کو قوم سلام پیش کرتی ہے'۔

وزیراعظم نے  شہداء کے بلند درجات اور لواحقین کے لیے صبر اور حادثے میں زخمی ہونے والے جوانوں کی جلد صحت یابی کی دعا کی ہے۔

واضح رہے کہ آزاد کشمیر میں پاک فوج کی گاڑی کو حادثہ پیش آیا جس میں 9 جوان شہید اور 4 زخمی ہوگئے۔ 
 
پاک فوج کے شعبہ تعلقات عامہ (آئی ایس پی آر) کے مطابق زخمیوں کو طبی امداد کے لیے سی ایم ایچ راولپنڈی منتقل کر دیا گیا ہے۔

آئی ایس پی آر کا کہنا ہےکہ شہدا کی نماز جنازہ منگلا چھاؤنی میں ادا کردی گئی ہے، نماز جنازہ میں کورکمانڈر راولپنڈی لیفٹیننٹ جنرل ساحرشمشاد مرزا سمیت فوجی حکام شریک ہوئے۔