سابق سوویت رہنما میخائل گوربا چوف انتقال کر گئے

خبررساں ادارے کے مطابق  میخائل گورباچوف ایک طویل علالت کے بعد رات کو انتقال کر گئے ، وہ سینٹرل کلینیکل اسپتال میں زیر علاج تھے۔ 

گوربا چوف 54 سال کی عمر میں سوویت کمیونسٹ پارٹی کے سیکریٹری جنرل اور ملک کے سربراہ بنے ۔ اس وقت وہ ملک پر حکومت کرنے والی کونسل، پولٹ بیورو، کے کم عمر ترین رکن تھے اور کئی برس تک عمر رسیدہ سربراہان کے بعد ان کو تازہ ہوا کے جھونکے سے مشابہت دی جا رہی تھی۔

برطانوی میڈیا کے مطابق گورباچوف نے54 برس میں 1985 میں  اقتدار سنبھالا، وہ اصلاحات متعارف کروانے اور مغرب سے تعلقات بحال کرنے کے لیے جانے جاتے تھے لیکن وہ 1991 میں سوویت یونین کو بکھرنے سے روک نہیں سکے۔

کئی روسی شہری آج بھی ان کو اور ان کی اصلاحات کو ملک کے بکھرنے پر مورد الزام ٹھہراتے ہیں ، میخائل گوربا چوف کا شمار 20 ویں صدی کی سب سے اہم ترین سیاسی شخصیات میں کیا جاتا ہے ۔

انھوں نے 70 سال تک قائم رہنے والے سوویت یونین کی باگ دوڑ ایک ایسے وقت میں سنبھالی جب ایشیا اور مشرقی یورپ پر کسی زمانے میں راج کرنے والا ملک بکھرنے والا تھا۔

 میخائل گورباچوف کوسال 1990 میں  اُن کی امن کے لیے خدمات کے اعتراف میں نوبل پرائز بھی دیا گیا تھا ۔ 

امریکی صدر جو بائیڈن نے میخائل گورباچوف کی موت پر تعزیتی پیغام میں اُن کو ’غیرمعمولی لیڈر‘ قرار دیا جس نے دنیا کو محفوظ بنایا۔ 

روس کے صدارتی دفتر کے ترجمان  کے مطابق  اس سلسلے میں صدر پوتن نے گہرے دکھ کا اظہار کرتے ہوئے کہا ہے کہ وہ ان کے اہلخانہ اور دوستوں کو تعزیت کا ٹیلیگرام بھیجیں گے۔