ترکیہ کی جانب سے سیلاب متاثرین کی بروقت مدد اور تعاون کو قدر کی نگاہ سے دیکھتے ہیں: وزیراعظم

تفصیلات کے مطابق آج  اسلام آباد میں ترکیہ کے وزیر داخلہ سلیمان سوئیلو اور وزیر ماحولیات MURAT KURUM کی قیادت میں ایک وفد سے گفتگو کرتے ہوئے  وزیراعظم نے مشکل گھڑی میں پاکستان کی ہمیشہ مدد کرنے پر ترکیہ کی عوام کا شکریہ ادا کیا اور کہا کہ ترکیہ کے تاجر بھی بڑے پیمانے پر امدادی سامان پاکستان بھجوا رہے ہیں۔

وزیر اعظم نے وفد کو بتایا کہ سیلاب سے تین سو بچوں سمیت ایک ہزار سے زائد افراد جاںبحق ہو گئے ہیں اور لاکھوں افراد بے گھر ہو گئے ہیں۔انہوں نے کہا کہ اِس آفت سے فصلیں اور مکانات تباہ ہو گئے ہیں اور عوام کھلے آسمان تلے رہنے پر مجبور ہیں۔

شہباز شریف نے اِس یقین کا اظہار کیا کہ اللہ تعالیٰ اور برادر ملکوں کی مدد سے پاکستان اِس غیر معمولی ہنگامی صورتحال سے نکل آئے گا اور آگے بڑھے گا۔

 ترکیہ کے وزیرداخلہ سلیمان سوئیلو نے ملک کے تمام حصوں بالخصوص بلوچستان، سندھ، خیبر پختونخوا اور جنوبی پنجاب میں تباہ کن طوفانی بارشوں اور سیلاب سے متاثرہ عوام کے ریسکیو اور ریلیف اور تباہ ہونے والے انفراسٹرکچر کی بحالی کے لیے وزیراعظم شہباز شریف کی قیادت میں حکومت کی بھرپور امدادی کارروائیوں کی تعریف کی ۔ انہوں نے خاص طور پر بے نظیر انکم سپورٹ پروگرام کے تحت فی متاثرہ خاندان 25000 روپے کی ہنگامی رقم کی فراہمی پر حکومت کو سراہا ۔

سلیمان سوئیلو نے ترک حکومت اور عوام کی جانب سے حکومت پاکستان کی امداد اور بحالی کی کوششوں میں مالی تعاون کرنے کے اپنے پختہ عزم کا اظہار کیا۔