حکومت کی دانشمندانہ پالیسیوں کی بدولت قومی معیشت درست سمت میں گامزن ہے : مفتاح اسماعیل  

تفصیلات کے مطابق پاکستان کی موجودہ معاشی حالت کے بارے میں ایک مباحثے میں اظہار خیال کرتے ہوئے وزیر خزانہ مفتاح اسماعیل کا کہنا تھا کہ  اقتدار سنبھالنے کے بعد آئی ایم ایف پروگرام کی بحالی حکومت کی اوّلین ترجیح تھی ، ٹیکس کا دائرہ بڑھایا جا رہا ہے اور کاروباری طبقے کو ٹیکس کے دائرہ میں لایا جا رہا ہے۔ 

انہوں نے کہا کہ حکومت نے دانشمندانہ پالیسیاں اختیار کرتے ہوئے ملک کو دیوالیہ ہونے سے بچایا۔

مفتاح اسماعیل نے کہا کہ سیلاب نے ملک میں بڑے پیمانے پر تباہی لائی ہے، انہوں نے کہا کہ متاثرہ عوام کو امداد کی فراہمی کے پیش نظر بے نظیر انکم سپورٹ پروگرام کے ذریعے شفاف انداز میں 28 ارب روپے تقسیم کئے گئے ہیں۔

انہوں نے کہا کہ ابتدائی طور پر متاثرہ خاندانوں کو 25 ہزار روپے کی رقم منتقل کی جا رہی ہے تاکہ وہ اپنے کھانے پینے کا بندوبست کر سکیں۔

وزیر خزانہ نے کہا کہ آزمائش کی اس گھڑی میں سیلاب سے متاثرہ عوام کو تنہا نہیں چھوڑا جائے گا اور تمام دستیاب وسائل بروئے کار لاتے ہوئے حتیٰ کہ سرکاری شعبے کے ترقیاتی پروگرام کے تحت اخراجات کا رخ بھی ان کی بحالی کی طرف موڑتے ہوئے متاثرین کی مدد کی جائے گی۔