پی ڈی ایم کا سیاسی جنازہ دھوم سے نکلے گا، شیخ رشید

سربراہ عوامی مسلم لیگ شیخ رشید کا کہنا ہے کہ 3 رشتہ دار اور عدالتی ضمانتوں پرمفرور24 کروڑ پاکستانیوں کے مستقبل کا لندن میں فیصلہ کریں گے،خرم دستگیر کہتے ہیں کہ قومی سلامتی کے اداروں کے مستقبل کا فیصلہ بھی لندن میں یہی کریں گے۔کسی مسلم لیگی لیڈرکو اس میٹنگ میں بیٹھنےکی اجازت نہیں تھی۔ 

سابق وزیر داخلہ نے سماجی رابطے کی ویب سائیٹ ٹویٹر پر کہا کہ پی ڈی ایم کا سیاسی جنازہ دھوم سے نکلے گا۔نوازشریف پاکستان آنے سے گھبرائیں گے،150 روپے کلو نایاب آٹا خریدنے والے ریاست اور سیاست سے مایوس ہو گئے ہیں۔ شیخ رشید نے کہا کہ جس اتحادی نے عمران خان کی حکومت کو چھرا گھونپا وہ عوامی حمایت سے محروم ہو گئے۔ہمسایہ ممالک کی کرنسی بھی پاکستان سے بہتر ہوگئی ہے۔انکا کہنا تھا کہ بلاول بھٹو کو ملک چھوڑنے کا بہانہ چاہیے۔انہوں نے 70 غیرآئینی وزراء کے خلاف لاہور ہائیکورٹ جانے کا اعلان بھی کیا۔

3رشتیدار،عدالتی ضمانتوں پرمفرور24کروڑ پاکستانیوں کےمستقبل کالندن میں فیصلہ کرینگےخرم دستگیرکہتےہیں قومی سلامتی کےاداروں کےمستقبل کافیصلہ بھی لندن میں یہی کرینگے۔کسی مسلم لیگی لیڈرکواس میٹنگ میں بیٹھنےکی اجازت نہیں تھیPDMکاسیاسی جنازہ دھوم سےنکلےگانوازشریف پاکستان آنےسےگھبرائیں گے

— Sheikh Rashid Ahmed (@ShkhRasheed) September 19, 2022

ادھر سابق وزیر اطلاعات اور تحریک انصاف کے رہنماء فواد چوہدری کا کہنا ہے کہ پاکستان کے عوام پاک فوج کو اپنے دل کے قریب رکھتے ہیں۔ایک سزا یافتہ مجرم کا اس ادارے کا سربراہ مقرر کرنے کا فیصلہ فوج کے وقار اور احترام کے منافی ہے،اور تحریک انصاف اس سنگین قانونی خلاف ورزی پر شدید احتجاج کرتی ہے۔ 

فواد چوہدری نےاپنے بیان میں کہا کہ ن لیگ کے وزراء یہ کہہ رہے ہیں کہ لندن میں نئے آرمی چیف کی تقرری کے ضمن میں شہباز شریف اور نواز شریف کی ملاقات ہوئی ہے اور نواز شریف نئے آرمی چیف کا فیصلہ کریں گے۔ایسی فیصلہ سازی آفیشل سیکریٹ ایکٹ کی شدید خلاف ورزی ہے، اور شہباز شریف اپنے حلف سے روگردانی کے مرتکب ہیں۔ قبل ازیں فواد چوہدری کا کہنا تھا الیکشن کا اعلان نہ ہوا تو دو ہفتوں میں احتجاج کی کال دیں گے،پورے ملک کی تنظیموں کو کال دے دی گئی ہے کہ وہ مہنگائی کے خلاف باہر نکلیں۔تمام پاکستانیوں کا شکریہ جنہوں نے سیلاب زدگان کی مدد کی۔وزیر خزانہ اور وزیر اعظم تقریروں میں رونے کے علاوہ کچھ نہیں کررہے۔