اثاثہ جات ریفرنس : اسحاق ڈار کے وارنٹ گرفتاری منسوخ

تفصیلات کے مطابق احتساب عدالت اسلام آباد کے جج محمد بشیر نے ریفرنس کی سماعت کی ، دورانِ سماعت اسحاق ڈار اپنے وکیل قاضی مصباح کے ہمراہ عدالت میں پیش ہوئے ۔ اسحاق ڈار کے وکیل قاضی مصباح عدالت نے اسحاق ڈار کے وارنٹس مستقل طور پر منسوخ کرنے کی استدعا کی ، وکیل نے کہا کہ اسحاق ڈار کی جائیداد ضبطگی کا آرڈر بھی ختم کیا جائے ، اسحاق ڈار اب عدالت کے سامنے موجود ہیں۔

جج محمد بشیر نے کہا کہ کیا نیب نے خود بھی اسحاق ڈار کے کوئی وارنٹس جاری کیے تھے؟ تفتیشی افسر نادر عباس نے جواب دیا کہ ہم نے وارنٹس جاری کئے تھے لیکن وہ معطل ہو گئے تھے۔

عدالت نے صرف اسحاق ڈار کی حاضری کیلئے وارنٹس جاری کیے تھے ، عدالت نے نیب سے سوال کیا کہ اب آپ کا کیا موقف ہے وارنٹس منسوخ کئے جائیں یا نہیں ؟ نیب پراسیکیوٹر نے بھی وارنٹس منسوخی کی حمایت کر دی، کہا عدالت کا وارنٹ صرف اسحاق ڈار کی حاضری کیلئے ہی تھا۔

اسحاق ڈار کے وکیل نے کہا کہ اسحاق ڈار نے ایک کانفرنس کیلئے بیرون ملک جانا ہے ، جج محمد بشیر نے کہا کہ ضمنی ریفرنس بھی آیا ہوا اس کے تحت دوبارہ فرد جرم ہونی ہے، وکیل نے جواب دیا کہ اس پر ہم دلائل دیں گے ضمنی ریفرنس بنتا نہیں۔

اسحاق ڈار کی جانب سے جائیداد ضبطگی کیخلاف درخواست دائر کی گئی، جس کے ساتھ ہی اسحاق ڈار نے حاضری سے مستقل استثنی کی درخواست بھی دائر کر دی۔

اسحاق ڈار کی دونوں درخواستوں پر نیب کو نوٹس جاری کر دیا گیا، جس کے بعد اسحاق ڈار کیخلاف کیس کی سماعت آئندہ بدھ تک ملتوی کر دی گئی ، اسحاق ڈار کی حاضری معافی اور جائیداد قرقی کے خلاف درخواستوں پر نیب کو نوٹس جاری کیا گیا، احتساب عدالت نے نیب سے 12 اکتوبر تک جواب طلب کرلیا۔

 وزیرخزانہ اسحاق ڈار نے عدالت سے باہر میڈیا سے بات کرتے ہوئے کہا کہ دنیا نے پاکستان پر معاشی پابندیاں لگائی تھیں، ہم نے اس مشکل وقت میں معیشت کو درست سمت میں گامزن کیا، ڈالر کی قیمت مصنوعی طور پر بڑھائی گئی ، روپے کو صحیح قدر پر واپس لے کر جائینگے ، ڈالر کے مقابلے میں روپے کی قدر بڑھ رہی ہے ، کرنسی کی قدر کو مستحکم رکھنا چیلنج ہوتا ہے اور کڑوروں کمانے کیلئے ملک کو قرضوں میں ڈبویا نہیں جا سکتاہے ۔ 

اسحاق ڈار نے کہا کہ پاکستان کی عوام کیساتھ کھیل نہیں کھیلا جا سکتا  ،  گزشتہ حکومت کی بدترین معاشی پالیسی کا خمیازہ بھگت رہے ہیں، شہباز شریف نے ملک کو ڈیفالٹ ہونے سے بچایا ،  چار سال میں خراب کی گئی معیشت کو فورا درست لیکن سیاست کے نام پر انتقام کا نشانہ بنایا گیا۔

وزیرخزانہ کے مطابق معیشت کے ساتھ سیاست مت کریں ، ، ملک میں منفی سیاست کا سلسلہ بند کرنا چاہیے ، سیاسی جماعتوں کو ملکر ملک کو بحران سے نکالنا چاہیے، سیاسی جماعتیں حلف اٹھائیں کہ معیشت کے ساتھ سیاست نہیں کریں گی۔