آج ذہنی صحت کاعالمی دن منایا جا رہا ہے

عالمی ادارہ صحت کی جانب سے ہر سال 10 اکتوبر کو ذہنی صحت سے متعلق آگاہی کا عالمی دن منایا جاتا ہے ا ور رواں برس آج کے دن کاموضوع ہے '' سب کے لئے ذہنی صحت کا حصول ایک عالمی ترجیح''۔

عالمی ادارہ صحت نے اس دن کے حوالے سے جاری پیغام میں کہا کہ عالمی وبا کرونا نے ہماری دماغی صحت پر نہایت منفی اثر ڈالا ہے جو تاحال جاری ہے ۔ آج کے دن مناتے ہوئے ہم یہ عہد کریں کہ ہمیں ذہنی صحت کے تحفظ اور بہتری کے لیے اپنی کوششوں کو دوبارہ سے منظم کرنا ہوگا۔

عالمی ادارہ صحت  کے مطابق سال 2019 سے  وبائی مرض سے پہلے ایک اندازے کے مطابق دنیا بھر میں ہر آٹھ میں سے ایک شخص ذہنی عارضے کے ساتھ زندگی گزار رہا تھا ،  اس وقت دماغی صحت کے لیے دستیاب خدمات اور فنڈز کی فراہمی ضرورت سے بہت کم تھی ۔ 

کورونا وائرس نے موجودہ حالات میں دماغی صحت کے لئے ایک عالمی بحران پیدا کردیا ہے، جس نے قلیل اور طویل مدت کے تناؤ کو ہوا دی اور لاکھوں لوگوں کی ذہنی صحت کو نقصان پہنچایا۔ اندازوں کے مطابق وبائی امراض کے ابتدائی سال کے دوران اضطراب اور افسردگی کے حالتوں میں 25 فیصد سے زیادہ اضافہ ہوا۔

عالمی ادارہ صحت  کے مطابق ہر 13 میں سے ایک شخص اینزائیٹی کا شکار ہے ،  ماہرین نفسیات کے مطابق پاکستان کی آبادی کا 34 فیصد حصہ ذہنی دباؤ، اینزائٹی اور ڈپریشن کا شکار ہے ۔  بے روز گاری ، امن و امان کی ابتر صورتحال اور سیلاب جیسی قدرتی آفت نے جہاں معاشرے میں جسمانی نقصان پہنچایا ہے وہیں ذہنی مسائل  میں بھی  کئی گنا اضافہ کیا ہے ۔