یوسف رضا گیلانی نااہلی کیس، علی حیدر گیلانی کا ویڈیو سے متعلق بیان پر یوٹرن

تفصیلات کے مطابق  یوسف رضا گیلانی نا اہلی کیس میں علی حیدر گیلانی نے ویڈیو سے متعلق بیان پر یوٹرن لے لیا،علی حیدر گیلانی نے تحریری جواب میں ویڈیو کو ٹمپرڈ قرار دیدیا۔علی حیدر گیلانی نے جواب جمع کرایا ہے کہ  وہ  ذمہ داران کیخلاف کارروائی کا حق محفوظ رکھتے ہیں۔

جواب میں کہا گیا ہے کہ  ووٹ کیلئے کسی پر دباؤ ڈالا نہ رشوت کی پیشکش کی،جعلی ویڈیو کو نشر کرنا انتخابی عمل میں مداخلت کے مترادف ہے، پی ٹی آئی سے الزامات کے ٹھوس شواہد طلب کیے جائیں، میرے وکیل کو تاحال ویڈیوز فراہم ہی نہیں کی گئیں، پریس کانفرنس میں ویڈیوز کا کوئی اعتراف نہیں کیا تھا۔

علی حیدر گیلانی کا  جواب میں کہنا تھا کہ   میڈیا سے گفتگو کو بطور ثبوت پیش نہیں کیا جا سکتا، ڈسکہ اور ویڈیو سکینڈل کیس کے حقائق میں بہت فرق ہے؟ درخواست گزاروں نے سنی سنائی باتوں پر انحصار کیا ہے۔ علی حیدر گیلانی نے استدعا کی ہے کہ  ویڈیو سکینڈل سے متعلق پی ٹی آئی کی درخواستیں خارج کی جائیں۔

واضح رہے کہ   گزشتہ ماہ یوسف رضا گیلانی کے بیٹے  علی حیدر گیلانی کی   سینیٹ الیکشن میں  مبینہ طور پر ووٹ خریدنے کی ویڈیو سامنے آئی تھی، مبینہ ویڈیو میں علی حیدر گیلانی پی ٹی آئی ایم این اے کو ووٹ ضائع کرنے کا طریقہ بتا رہے تھے۔