پاکستان کے سب سے مقبول لیڈر کو نا اہل کرنا قوم کے ساتھ مذاق ہے،پرویز الٰہی

وزیر اعلٰی پنجاب چوہدری پرویز الٰہی نے عمران خان کو نا اہل قرار دینے پر الیکشن کمیشن کے فیصلے پر ردِعمل دیا ہے۔ انہوں نے کہا کہ ہر لمحہ اپنے لیڈر عمران خان کے ساتھ ہیں۔عمران خان کو نااہل قرار دینے کا فیصلہ مسترد کرتے ہیں۔ چوہدری پرویز الٰہی نے سماجی رابطے کی ویب سائیٹ ٹویٹر پر کہا کہ پاکستان کے سب سے مقبول لیڈر کو نااہل کرنا قوم کے ساتھ سنگین مذاق ہے،اپنے لیڈر کے ساتھ کھڑے ہیں اور کھڑے رہیں گے۔

ہر لمحہ اپنے لیڈر عمران خان کے ساتھ ہیں۔ عمران خان کو نااہل قرار دینے کا فیصلہ مسترد کرتے ہیں۔ پاکستان کے سب سے مقبول لیڈر کو نااہل کرنا قوم کے ساتھ سنگین مذاق ہے۔ اپنے لیڈر کے ساتھ کھڑے ہیں اور کھڑے رہیں گے۔#عمران_خان_ہماری_ریڈ_لائن

— Ch Parvez Elahi (@ChParvezElahi) October 21, 2022

دوسری جانب تحریک انصاف نے عمران خان کے خلاف الیکشن کمیشن کے فیصلے کو مسترد کر دیا۔ رہنما پی ٹی آئی فواد چوہدری نے کہا ہے کہ الیکشن کمیشن کا نشانہ صرف عمران خان ہیں،کیا یہ 22 کروڑ لوگوں کو نا اہل کر دیں گے؟الیکشن کمیشن سے کبھی بھلے کی امید نہیں تھی۔ فواد چوہدری کا کہنا تھا کہ یہ پاکستان کے آئین اور اداروں پر حملہ ہے،

عمران خان ایک ہفتہ قبل دو تہائی اکثریت سے جیت کر آ رہے ہیں۔ الیکشن کمیشن کے ممبر اپنے عہدوں پر برقرار رہنے کے اہل نہیں،الیکشن کمیشن کا رویہ شرمناک ہے۔انہوں نے وہی کیا کہ جس کی امید تھی۔یہ قانون پر حملہ ہے،صرف عمران خان نشانہ ہیں۔ رہنما پی ٹی آئی کا کہنا تھا کہ تم ہوتے کون ہو یہ فیصلہ کرنے والے،یہ قوم کے منہ پر طمانچہ ہے۔ عوام سے اپیل کرتا ہوں کہ اپنے حق کیلئے باہر نکلیں،تحریک انصاف فیصلہ مسترد کرتی ہے۔

ان ایوانوں کو الٹا کر ہی آئین کو بچایا جا سکتا ہے۔ یاد رہے کہ الیکشن کمیشن نے توشہ خانہ ریفرنس میں سابق وزیراعظم عمران خان کو نااہل قرار دے دیا۔ الیکشن کمیشن نے چیئرمین پی ٹی آئی عمران خان کیخلاف توشہ خانہ کیس کا فیصلہ سنادیا۔الیکشن کمیشن کے مطابق عمران خان کی نااہلی 5 رکنی کمیشن کا متفقہ فیصلہ ہے۔الیکشن کمیشن کے فیصلے کے مطابق چیئرمین پی ٹی آئی عمران خان نے غلط گوشوارے جمع کروائے۔