مسلم لیگ ن نے لانگ مارچ کو ناکام بنا کر اسٹبلشمنٹ کی مدد کی : شازیہ مری

پاکستان پیپلزپارٹی کی مرکزی سیکریٹری اطلاعات اور رکن قومی اسمبلی شازیہ مری کا اہم بیان،شازیہ مری کا کہنا ہے کہ  شاہد خاقان عباسی اور احسن اقبال خود وزیراعظم بننے کے لئے پی ڈی ایم کو نقصان پہنچارہے ہیں۔انہوں نے سوال کرتے ہوئے کہا کہ  جے یو آئی کے پی ٹی آئی کے ساتھ سندھ میں اتحاد پر کب شوکاز نوٹس جاری ہوگا؟پنجاب میں مک مکا کرکے ن لیگ کی جانب سے پی ٹی آئی کے 11 سینیٹرز منتخب کروانے کے معاملے پر کب شوکاز نوٹس جاری ہوگا؟۔

شازیہ مری کا مزید کہنا تھا کہ   ن لیگ نے اچانک لانگ مارچ سے استعفوں کو جوڑ کر پی ٹی آئی حکومت کو بچانے کی ناکام کوشش کی، اس پر شو کاز جاری ہوگا؟  بلاول بھٹو پنجاب حکومت گراتے ہوئے لانگ مارچ کے لئے نکلتے تو عمران نیازی اسلام آباد سے بھاگ جاتے، مسلم لیگ ن نے لانگ مارچ کو ناکام بنا کر اسٹبلشمنٹ اور پی ٹی آئی کی مدد کی ہے، اس پر کب ایکشن ہوگا؟ مسلم لیگ ن وزیراعلی پنجاب کو اس لئے نہیں ہٹانا چاہتی تاکہ اگلے انتخابات میں عثمان بزدار کی نااہلی کو جواز بناسکے، مسلم لیگ ن کو اگر عوام کی فکر ہوتی تو آج پنجاب حکومت گرادیتی مگر انہیں صرف اپنے اقتدار کی فکر ہے۔

پی پی رہنما شازیہ مری کا کہنا تھا کہ    پی ڈی ایم کی تمام سیاسی کامیابیاں بلاول بھٹو کے وژن کا نتیجہ ہیں،ہم سب کو ساتھ لے کر چلنا چاہتے ہیں تاہم ایک بلاول بھٹو اکیلے بھی عمران نیازی کے لئے کافی ہے۔