لانگ مارچ کے باعث اسلام آباد کے تمام ہسپتال ہائی الرٹ

 پاکستان تحریک انصاف کے لانگ مارچ کے باعث وفاقی دارالحکومت اسلام آباد کے تمام ہسپتالوں کو ہائی الرٹ کردیا گیا۔ میڈیا رپورٹس کے مطابق اسلام آباد میں واقع ہسپتالوں پمز، پولی کلینک اور ایف جی ایچ کے عملے کی چھٹیاں منسوخ کردی گئی ہیں اور ہسپتالوں کے عملے کے شہر چھوڑنے پر تاحکم ثانی پابندی عائد کردی گئی ہے، انتظامیہ کو اضافی بیڈز، خون، ادویات ذخیرہ کرنے کی بھی ہدایت کی گئی ہے۔ 

بتایا گیا ہے کہ پمز، پولی کلینک کے تمام سینیئر ڈاکٹروں کو آن کال دستیاب رہنے کی ہدایات جاری کی گئی ہیں، شعبہ ایمرجنسی، ہڈی وجوڑ، جنرل سرجری، میڈیسن کے ڈاکٹرز آن کال دستیاب رہیں گے جب کہ شعبہ نیورو سرجری، برن سینٹر، ای این ٹی کے سینیئر ڈاکٹرز کو بھی آن کال دستیابی یقینی بنانے کا کہا گیا ہے۔ 

علاوہ ازیں اسلام آباد اور اس کے گردونواح میں ماہر نشانہ باز تعینات کرنے کا فیصلہ کرلیا گیا، سکیورٹی فورسزکو ہدایات جاری کی گئی ہیں کہ کسی بھی ہنگامی صورتحال کیلئے ہر وقت الرٹ رہا جائے، اسلام آباد کے سکیورٹی اداروں نے فیصلہ کیا ہے کہ اسلام آباد کو جانے والے تمام غیر روایتی رابطے پیر سے سیکیورٹی کی وجہ سے بند کردئے جائیں، اس مقصد کے لئے تربیت یافتہ نشانے باز مارگلا ہلز اور اطراف کے علاقوں میں تعینات کردئے جائیں گے تاکہ کوئی بھی کرمنل داخل نہ ہوپائے۔

جنگ اخبار کے مطابق سکیورٹی کے سخت اقدامات پاکستان تحریک انصاف کے رہنما علی امین گنڈاپور کی آڈیو لیک کے بعد کئے جارہے ہیں آڈیو میں اسلام آباد کے باہر اسلحہ جمع کرنے کے خدشے کے تحت کئے جارہے ہیں، ماہر نشانہ باز اہلکاروں کو پہلی مرتبہ تعینات کیا جارہا ہے کیوں کہ آڈیو لیک کی وجہ سے اسلام آباد اور اطراف کے علاقوں کے رہائشی خوفزدہ ہیں، اس لیے اسلام آباد اور اطراف کے علاقوں میں امن و امان کی فضا برقرار رکھنے کے لئے ہر ممکن کوشش کی جائے گی اور سیکیورٹی برقرار رکھنے کے لئے کسی بھی اقدام سے گریز نہیں کیا جائے گا ۔