عمران خان کے کنٹینر پر فائرنگ ، ابتدائی تحقیقات مکمل

پولیس ذرائع کے مطابق جائے وقوعہ سےگولیوں کے گیارہ خول ملے  ہیں ، 9خول چھوٹے پستول کی گولیوں اور2 بڑے اسلحہ کی گولیوں کے ہیں۔

پولیس کے مطابق پستول کی گولیاں نیچے سے اوپر کنٹینر کی طرف چلائی گئیں جبکہ  بڑے اسلحے والی گولیاں کنٹینر سے نیچے کی طرف چلائی گئیں ، جاں بحق نوجوان معظم ملزم کو  پکڑنے کی کوشش کر رہا تھا۔

پولیس کے مطابق  معظم کے سر میں گولی لگی، جس سے وہ موقع پر جاں بحق ہوا،  واقعے میں 13 افراد زخمی ہوئے ، 4 افراد گولیاں لگنے سے زخمی،باقی افراد کے زخموں کی نوعیت الگ ہے۔

گزشتہ روز گوجرانوالہ میں لانگ مارچ کے دوران چیئرمین پی ٹی آئی کے کنٹینر پر فائرنگ سے ایک شخص جاں بحق جبکہ عمران خان اور فیصل جاوید سمیت 13 افراد زخمی ہوگئے۔

دوسری جانب عمران خان آج 11 بجے پارٹی قیادت کے ساتھ اہم میٹنگ کریں گے جس کے بعد تحریک انصاف اپنا اگلا لائحہ عمل تیار کرے گی۔