ملک کے مستقبل کا فیصلہ چوروں کا ٹبر کررہا ہے، عمران خان

لانگ مارچ سے خطاب کے دوران عمران خان نے کہا کہ لندن میں ایک تماشا ہورہا ہے، نئے آرمی چیف کا فیصلہ لندن میں ہورہا ہے اور یہ فیصلہ ایک سزا یافتہ آدمی کررہا ہے۔ ملک کے مستقبل کا فیصلہ چوروں کا ٹبر کررہا ہے۔

عمران خان نے کہا کہ ہم پر الزام لگایا جاتا ہے کہ ہم نے آرمی چیف کی تعیناتی کا معاملہ متنازع کردیا ہے، میں کہتا ہوں جو بھی میرٹ پر ہو اسے آرمی چیف بنا دیں، مجھے نہ تو نیب کا، چیف جسٹس اور نہ ہی کسی اور ادارہ کا سربراہ چاہیے جو بھی ہو میرٹ پر تعیناتی ہو۔

سابق وزیراعظم نے کہا کہ دنیا کے کسی مہذب معاشرے میں کوئی یہ تصور بھی نہیں کرسکتا کہ ملک کے فیصلے باہر ہوں اور وہ لوگ کریں جو 30 سال سے ملک کے پیسے چوری کرکے باہر بھیج رہے ہیں۔

چیئرمین تحریک انصاف نے کہا کہ شہباز شریف نے لندن میں برطانیہ کے ایک اخبار پر ہرجانے کا دعویٰ کیا، عدالت نے دسمبر میں شہباز شریف کو بلالیا ہے۔ شہباز شریف کو یہ نہیں پتہ کہ وہ کہاں پھنس گیا ہے۔

سابق وزیر اعظم نے کہا کہ جس معاشرے میں عدل نہیں وہ معاشرہ خوش حال اور آزاد نہیں ہوسکتا، اس معاشرے میں حقیقی آزادی اور جمہوریت نہیں آسکتی، تمام ترقی پزیر ملکوں کی ہی کہانی ہے، اس قوم کو حقییق آزادی دیں گے یہ قوم خود ہی اس ملک کو اٹھالے گی۔