عدالت نے 190 ملین پاؤنڈ ریفرنس میں بشریٰ بی بی کو گرفتارکرکے آئندہ سماعت پر پیش کرنے کا حکم دیدیا۔

احتساب عدالت کے جج ناصرجاوید رانا ںے اڈیالہ جیل میں ریفرنس کی سماعت کی، بشری بی بی آج بھی عدالت پیش نہ ہوئی، عدالت نے وارنٹ گرفتاری پرعملدرآمد کیلئے نوٹس دوبارہ جاری کر دیئے۔

واضح رہے کہ ملزموں کی جانب سے آج بھی 342کے سوالناموں پرجواب داخل نہ کروائے گئے۔

تاہم عدالت نے بشریٰ بی بی کو گرفتارکرکے آئندہ سماعت پر پیش کرنے کا حکم دے دیا۔ بعدازاں 190 ملین پاؤنڈ ریفرنس کیس کی سماعت 9 دسمبر تک ملتوی کردی گئی۔

 شامی باغی گروہ تحریر الشام ملیشیا اور دیگر باغی گروہوں نے شام کے اہم دفاعی شہرحما پر قبضہ کرلیا۔

غیر ملکی خبر ایجنسی کے مطابق شامی باغیوں کی حمص کی طرف بھی پیش قدمی جاری ہے،  اس کے ساتھ ہی ذرائع کا کہنا ہے کہ باغیوں کی حمص کی طرف پیش قدمی دمشق کے ساحلی علاقے سے روابط کاٹ سکتی ہے۔

حما پر قبضہ صدر بشارالاسد اور اُن کے اتحادیوں کیلئے بڑا دھچکا ہے، باغیوں نے گزشتہ ہفتے مرکزی شمالی شہر حلب پر قبضہ کیا تھا۔

شامی وزیر دفاع کا کہنا ہے حما میں جو کچھ ہوا وہ عارضی حکمت عملی ہے، شہر کے مرکز کے باہر فورسز کو دوبارہ تعینات کر دیا گیا ہے۔

واضح  رہے کہ اس سے قبل  شامی باغیوں نے ملک کے دوسرے بڑے شہر حلب پر بھی قبضہ کرلیا تھا۔

پاکستان اسٹاک ایکسچینج (پی ایس ایکس) میں ریکارڈ ساز تیزی کا رجحان آج بھی جاری رہا اور بینچ مارک کے ایس ای-100 انڈیکس میں 815 پوائنٹس کا اضافہ ہو گیا۔

پی ایس ایکس ویب سائٹ کے مطابق کاروبار کے اختتام پر کے ایس ای-100 انڈیکس 815 پوائنٹس یا 0.75 فیصد بڑھ کر ایک لاکھ 9 ہزار 53 پر پہنچا، جو گزشتہ روز ایک لاکھ 8 ہزار 238 پر بند ہوا تھا۔

اس سے قبل کاروبار کے آغاز میں  پاکستان اسٹاک مارکیٹ میں  100 انڈیکس بھی 109000 پوائنٹس کی حد عبور کرگیا تھا۔

کاروباری ہفتے کے پانچویں اور آخری روز سٹاک ایکسچینج میں کاروبار کے آغاز پر ہی زبردست تیزی دیکھی گئی۔

ٹریڈنگ کے دوران پاکستان اسٹاک مارکیٹ میں 1100 سے زائد پوائنٹس کا اضافہ ہوا اور 100 انڈیکس 109380 پوائنٹس کی بلند ترین سطح پر پہنچ گیا۔

واضح رہے کہ کاروباری ہفتے کے چوتھے روز پاکستان اسٹاک ایکسچینج میں کاروبار کے دوران 3 ہزار 134 پوائنٹس کا اضافہ ہوا، 100 انڈیکس 108238 پوائنٹس کی بلند ترین سطح پر بند ہوا۔