موسمیاتی تبدیلی کے حوالے سے بین الاقوامی فنڈ کا قیام پاکستان کے موقف کی فتح ہے : مریم اورنگزیب 

وزیر اطلاعات و نشریات مریم اورنگزیب  نے ایک بیان میں کہا کہ موسمیاتی تبدیلی سے متاثر ہونے والے ممالک کے لیے بین الاقوامی فنڈ کا قیام پاکستان کے موقف کی فتح ہے۔ 

مریم اورنگزیب نے کہا کہ وزیر اعظم شہباز شریف نے موسمیاتی تبدیلی اور پاکستان میں سیلاب سے ہونے والی تباہی کو عالمی ایجنڈے میں بدل دیا۔

 انہوں نے کہا کہ پاکستان کے موقف نے اس معاملے پر بین الاقوامی اتفاق رائے میں فیصلہ کن کردار ادا کیا۔

وزیر اطلاعات نے یقین ظاہر کیا کہ ڈیمیج اینڈ لاسس فنڈ کے قیام سے پاکستان میں سیلاب متاثرین کی بحالی میں مدد ملے گی۔

 انہوں نے اس سلسلے میں اقوام متحدہ کے سیکرٹری جنرل کی کوششوں کو بھی سراہتے ہوئے انہیں ترقی پذیر ممالک کا محسن قرار دیا۔

انہوں نے کہا کہ وزیر خارجہ بلاول بھٹو زرداری اور وزیر موسمیاتی تبدیلی شیری رحمان کی کاوشوں نے عالمی سطح پر پاکستان کے موقف کو منوانے میں کلیدی کردار ادا کیا ۔

ان کا کہنا تھا کہ تمام عالمی قائدین مبارک اور خراج تحسین کے مستحق ہیں جنہوں نے کرہ ارض کو بچانے کے لئے فیصلہ کن اور عملی قدم اٹھایا ۔یہ عالمی اتحاد موسمیاتی تبدیلیوں کے اثرات کے مقابلے میں اہم کردار ادا کرے گا۔